شاہ سلمان کے لیے برونڈی کے صدر کا مکتوب

خادم حرمین شریفین شاہ سلمان بن عبدالعزیز کو جمہوریہ برونڈی کے صدر کا مکتوب موصول ہوا ہے۔ دونوں ملکوں کے تعلقات کو مختلف شعبوں میں ہر سطح پر مضبوط بنانے اور جدید خطوط پر استوار کرنے کے طور طریقوں سے متعلق تجویز پیش کی گئی ہے۔ 

سعودی خبررساں ایجنسی ’ایس پی اے‘ کے مطابق جمہوریہ برونڈی کے صدر کا مکتوب سعودی وزیر خارجہ شہزادہ فیصل بن فرحان کو برونڈی کے وزیر خارجہ نے جمعرات کو دفتر خارجہ ریاض میں ملاقات کرکے پیش کیا۔ 

فیصل بن فرحان نے ریاض میں ایکسپو 2030 کی میزبانی سے متعلق سعودی عرب کی درخواست کی حمایت پر برونڈی کی حکومت کے لیے قدرو منزلت کا اظہار کیا۔ 

دونوں ملکوں کے وزرائے خارجہ نے  باہمی تعلقات اور مختلف شعبوں میں انہیں مضبوط بنانے کے حوالے سے تبادلہ خیال کیا۔ علاوہ ازیں باہمی دلچسپی کے علاقائی و بین الاقوامی مسائل بھی زیر بحث آئے۔  

اس موقع پر معاون وزیر مملکت برائے امور افریقی ممالک ڈاکٹر سامی الصالح بھی موجود تھے۔