سعودی عرب میں موسم کیسا رہے گا؟

ماہر موسمیات ڈاکٹر عبد اللہ المسند نے کہا ہے کہ ریاض کے مختلف علاقوں سمیت الاحسا، دمام، حائل اور مدینہ منورہ میں بارش کا امکان ہے۔

سبق ویب سائٹ کےمطابق انہوں نے کہا ہے کہ ’موسمی نقشوں کے مطالعے سے معلوم ہوتا ہے کہ مذکورہ علاقوں میں گھنے بادل جمع ہو رہے ہیں‘۔

دوسری طرف ماہر موسمیات عبدالعزیز الحصینی نے کہا ہے کہ ’آج فجر کے وقت قصیم، شقرا اور المحمل میں گرج چمک کے ساتھ بارش ہوگی‘۔

ادھر ریاض کے شمال میں حریملا اور شقرا میں درمیانے درجے کی بارش ہوئی جس کے باعث نشیبی علاقوں کے علاوہ وادیوں میں پانی بھر گیا۔

محکمہ موسمیات نے پیشگوئی کی ہے کہ ’تبوک، الجوف، شمالی حدود، حائل، قصیم اور ریاض میں آج بھی بارش ہوگی‘۔

’مذکورہ علاقوں میں درجہ حرارت میں واضح کمی محسوس کی جائے گی نیز رات کے وقت سرد ہوا چلے گی‘۔

محکمے نے کہا ہے کہ ’عسیر، باحہ اور مکہ مکرمہ کے بالائی علاقوں میں بھی آج بارش کا امکان ہے‘۔

دریں اثنا مدینہ منورہ میں آج بھی مطلع غبار آلود ہے جس کی وجہ سے حد نگاہ متاثر ہے۔

محکمے نے کہا ہے کہ ’مدینہ منورہ کی الحناکیہ اور الصویدرہ کمشنری میں 4 بجے عصر تک گردوغبار رہے گا‘۔