گوگل پر ڈالر 207 روپے، ’شہباز سپیڈ‘؟

پاکستان میں ان دنوں ڈالر روز ہی اونچی اڑان بھر رہا ہے، حکومت ڈالر کی بڑھتی قیمت کو قابو کرنے کی اپنی سی کوشش کر رہی ہے جو فی الحال کامیاب ہوتی نظر نہیں آ رہی۔ 

ایسے وقت میں جب روپے کی قدر گھٹتی جا رہی ہے اور ڈالر 239 روپے تک پہنچ گیا ہے، جمعرات کی شام اچانک ہی گوگل پر ڈالر کی قیمت 207 روپے دکھائی دی جس نے دیکھنے والوں کو چونکا دیا۔

سوشل میڈیا پر سکرین شاٹس شیئر کیے جانے لگے اور ہر کوئی یہ پوچھتا نظر آیا کہ ’اچانک ڈالر کا ریٹ اتنا کیسے گر گیا؟‘ کچھ صارفین خوشی کا اظہار کرتے نظر آئے لیکن ان کی خوش فہمی پر جلد ہی پانی پھر گیا جب یہ معلوم ہوا کہ دراصل یہ سرچ انجن گوگل کی غلطی ہے باقی ذرائع ڈالر کا اصل ریٹ بتا رہے ہیں۔

گوگل پر ایک ڈالر کی قیمت 207 روپے لکھی ہوئی آرہی ہے جبکہ ڈالر کی اصل قیمت 239 روپے ہے۔

رواں کاروباری ہفتے کے چار دنوں میں امریکی ڈالر کی قدر میں تقریبا 12 روپے کا اضافہ ریکارڈ کیا گیا ہے۔

گوگل پر ڈالر کی قیمت کی غلطی کے باعث سماجی رابطوں کی ویب سائٹ ٹوئٹر پر پاکستانی شہریوں کی جانب سے دلچسپ تبصرے دیکھنے میں آرہے ہیں۔

حمزہ نامی ایک صارف کہتے ہیں کہ 'ذرائع کے مطابق شہباز شریف نے گوگل کو 100 ملین ڈالر دیے ہیں تاکہ ڈالر کا ریٹ 207 روپے دکھائی دے۔‘

ڈاکٹر ثقلین نامی ایک صارف نے کہا ہے کہ 'گوگل کی غلطی نے 207 روپے ڈالر کی جھوٹی امید دکھا کر آپ کو دل کا دورہ پڑوایا ہے، اس پر بھروسہ نہ کریں، یہ انٹر بینک میں 237 روپے ہیں اور اوپن مارکیٹ میں 250 روپے ہے'۔

عائشہ یوسف نامی صارف کہتی ہیں کہ گوگل پر ڈالر 207 روپے پر نظر آرہا ہے، مریم نواز شریف ابھی بھی وقت ہے ٹویٹ کریں کہ یہ شہباز کی سپیڈ کی وجہ سے ہے، صبح 240 پر واپس آجائے گا'۔

احمد سبحان نامی ایک صارف کہتے ہیں کہ 'ڈالر 30 روپے کم ہوگیا، اب 207 روپے ہے، گوگل نے ن لیگ میں شمولیت حاصل کرلی ہے، مفتاح اسماعیل پریس کانفرنس ہی کردیں'۔

جیسمین نامی صارف نے میم شئیر کرتے ہوئے کہا ہے کہ ’کچھ منٹوں بعد گوگل کہے گا کہ کیسا لگا میرا مذاق؟‘