ایل بی ڈبلیو کی اپیل اور ری پلے کی ایکٹنگ کی ویڈیو وائرل

اکستان سپر لیگ کے پہلے مرحلے کے میچ کراچی میں مکمل ہو کر ٹورنامنٹ دوسرے مرحلے کے لیے لاہور منتقل ہوا تو عارضی وقفے کے دوران کم عمر کرکٹرز کی ایک دلچسپ ویڈیو وائرل ہوئی ہے۔

گلگت بلتستان سے شیئرکردہ ایک ویڈیو میں موجود بچوں کو ایل بی ڈبلیو کی اپیل اور پھر اس پر ریویو کی ایکٹنگ کرتے ہوئے دکھایا گیا تو ان کی معصومیت اور انداز دیکھنے والوں کو متاثر کیے بغیر رہ نہیں سکا۔

کئی حصوں پر مشتمل مختصر دورانیے کے ویڈیو کلپس پر ردعمل دینے والوں نے اسے سے خوب لطف اٹھایا تو کرکٹ کو ایکٹنگ بنانے کا آئیڈیا بھی پسند کیا۔

چند گھنٹوں کے دوران ہزاروں ویوز لینے والی ویڈیو میں اپیل کے بعد جب ریویو لیا گیا تو ٹیلی ویژن پر دکھائی دینے والے ریویو کے مناظر کو کاپی کرنے کی پوری کوشش کی گئی ہے۔

اس دوران جہاں ایمپائر نے اپنا کردار خوب نبھایا وہیں بولر اور اس کے بعد سٹرائکر اینڈ پر موجود کھلاڑی بھی پیچھے نہ رہے۔

ویڈیو میں واضح ہے کہ بولر نے گیند کرانے کے بعد اپیل کی لیکن ایمپائر نے اسے آؤٹ قرار نہ دیا۔ جس پر بولر نے ساتھی کھلاڑیوں سے مشورے کے بعد ریویو لیا۔

امپائر نے ریویو کا اشارہ کیا جس کے بعد بلے باز اور اسے گھیر کر کھڑے فیلڈرز کے درمیان بولر نے گیند اٹھا اٹھا کر یوں بیٹر کی ٹانگ پر پھینکی گویا ٹیلی ویژین پر کسی منظر کو دوبارہ، سہ بارہ چلایا جا رہا ہو۔

ویڈیو دیکھنے والوں نے اسے سراہا تو شکوہ بھی کیا کہ ٹک ٹاک پر مخصوص مواد ہی پروموٹ ہوتا ہے۔

عاصمہ نے ویڈیو میں پیش کردہ مواد پر تبصرہ کرتے ہوئے لکھا ’کیا ہم اس بات کو نظرانداز کریں گے کہ انہوں نے تربوز سے ہیلمٹ بنا رکھا ہے۔‘

پاکستان سپر لیگ سیون سیون کے دوسرے مرحلے کے میچ 10 جنوری سے لاہور کے قذافی سٹیڈیم میں شروع ہو رہے ہیں۔