ہمارے جانے پر کراچی رو رہا ہے‘

پاکستان کے محکمہ موسمیات کا کہنا ہے کہ ملک کے ساحلی شہر کراچی سمیت صوبہ سندھ کے دیگر شہروں اور اضلاع میں اگلے چوبیس گھنٹوں کے دوران بارش کا سلسلہ جاری رہے گا۔

محکمہ موسمیات کے مطابق صوبہ سندھ کے بیشتر حصوں میں اگلئ چوبیس گھنٹوں کے دوران موسم ابرآلود رہے گا۔

تاہم کراچی، جامشورو، ٹھٹہ، سجاول، دادو، جیکب آباد، شکارپورم سکھر اور گھوٹکی میں ہلکی بارش یا بوندا باندی ہوگی۔

منگل کے روز بھی کراچی میں موسلادھار بارش ہوتی رہی اور سوشل میڈیا صارفین شہر سے ویڈیوز ٹوئٹر اور فیس بک پر شیئر کرتے رہے۔

صارفین کا کہنا ہے کہ بارش کے باعث شہر میں سردی میں اضافہ ہوسکتا ہے۔

جہاں سے لوگ بارش کو انجوائے کرتے رہے وہیں ہمیشہ کی طرح ایک بار پھر کراچی کے شہری سڑکوں پر پانی جمع ہوجانے کی شکایات کرتے ہوئے دکھائی دیے۔

پی ایس ایل کی کمنٹری کے لیے پاکستان میں موجود ایرن ہالینڈ نے کراچی کے موسم پر تبصرہ کرتے ہوئے لکھا کہ ’ہمارے جانے پر کراچی رو رہا ہے۔‘

انہوں نے یہ سوشل میڈیا پیغام ایک ایسے وقت میں دیا جب پی ایس ایل کا پہلا مرحلہ کراچی میں مکمل ہونے کے بعد ٹیمیں دوسرے مرحلے کے لیے لاہور پہنچ رہی ہیں۔

محکمہ موسمیات کے مطابق منگل کے روز کراچی کے علاقوں سعدی ٹاؤن میں 17 ملی میٹر، سرجانی ٹاؤن میں 14 ملی میٹر، گڈاپ ٹاؤن میں 10 ملی میٹر، یونیورسٹی روڈ پر 9 ملی میٹر، قائدآباد میں 7 ملی میٹر اور کیماڑی میں 5 ملی میٹر بارش ریکارڈ کی گی۔