یمن:غیر ملکی عسکری ماہرین کی موجودگی کے ثبوت مل گئے، عرب اتحاد

 ریاض .... عرب اتحاد کے ترجمان کرنل ترکی المالکی نے کہا ہے کہ انھیں یمن میں غیر ملکی عسکری ماہرین کی موجودگی کے ٹھوس ثبوت مل گئے ہیں اور وہ وہاں ایران کے حمایت یافتہ حوثی شیعہ باغیوں کو عسکری تربیت دے رہے ہیں۔منگل کو ترجمان عرب اتحاد کرنل المالکی نے سعو ریاض میں ایک پریس کانفرس سے خطاب کرتے ہوئے کہا کہ ان عسکری ماہرین نے حوثیوں کو ایک مربوط فوجی مواصلاتی نظام بھی مہیا کیا ہے،لبنان کی ملیشیا حزب اللہ حوثیوں کی فوجی معاونت کی سرگرمیوں میں ملوّث ہے۔ انھوں نے یمن کے شمالی صوبے صعدہ کے مختلف علاقوں میں حزب اللہ کے ماہرین کے حوثی ملیشیا کی کارروائیوں میں کردار کا حوالہ بھی دیا ہے۔ ترجمان نے کہا کہ حالیہ دنوں میں عرب اتحادی فوج نے صعدہ میں واقع جبل مشطب،مران،رازح،المفتاح اور النوعہ کے پہاڑی علاقوں میں حوثی ملیشیا کے ایسے 5 فوجی مواصلاتی نظام اپنے فضائی حملوں میں تباہ کئے ہیں۔ان کے علاوہ صوبہ حجہ میں واقع جبل الوشحہ میں حوثیوں کے فوجی مواصلاتی نظام کو تباہ کیا گیا ہے۔انھوں نے یمن کی قانونی حکومت کی عمل داری کی بحالی کیلئے ایران کے حمایت یافتہ حوثی باغیوں کےخلاف جاری جنگ میں ہونےوالی پیش رفت کے بارے میں تفصیلی بریفنگ دی اور جنگ زدہ ملک کے تما م شہروں اور گورنریوں میں بگڑتی ہوئی انسانی صورتحال کی بہتری کے لیے عرب اتحاد کی امدادی سرگرمیوں کے بارے میں صحافیوں کو آگاہ کیا۔