سعودی ولی عہد شہزادہ محمد بن سلمان نے منگل کو جدہ میں انڈین وزیراعظم نریندر مودی کا خیرمقدم کیا ہے۔
سرکاری خبر رساں ایجنسی ایس پی اے کے مطابق جدہ کے قصر السلام میں وزیراعظم نریندر مودی کے لیے سرکاری استقبالیہ تقریب کا اہتمام کیا گیا۔
بعد ازاں سعودی ولی عہد اور انڈین وزیراعظم نے باضابطہ ملاقات کی۔
مزید پڑھیں
ملاقات میں دونوں دوست ملکوں کے درمیان دوطرفہ تعلقات کے پہلووں اور مختلف شعبوں میں انہیں بڑھانے اور ترقی دینے کے طریقوں کا جائزہ لیا گیا۔
سعودی ولی عہد اور وزیراعظم نریندر مودی نے سعودی انڈین سٹریٹجک پارٹنر شپ کونسل کے اجلاس کی صدرات کی، کونسل کے ایجنڈے کے متعدد امور کا جائزہ لیا گیا۔
سعودی ولی عہد اور انڈین وزیراعظم نے سعودی، انڈین سٹریٹجک پارٹنر شپ کونسل کے اجلاس کے منٹس پر دستخط کیے۔
اس موقع پر وزیر توانائی شہزادہ عبدالعزیز بن سلمان، مکہ ریجن کے نائب گورنر شہزادہ سعود بن مشعل بن عبدالعزیز، وزیرسپورٹس شہزادہ عبدالعزیز بن ترکی بن فیصل، وزیرداخلہ شہزادہ عبدالعزیز بن سعود بن نایف اور دیگر وزرا موجود تھے۔
انڈین وزیرخارجہ ایس جے شنکر، قومی سلامتی کے مشیر اجیت ڈوول، مملکت میں انڈین سفیر ڈاکٹر سہیل اعجاز اور دیگر حکام نے بھی شرکت کی۔
قبل ازیں انڈین وزیراعظم نریندر مودی جدہ پہنچے تو کنگ عبدالعزیز انٹرنیشنل ایئرپورٹ پر ان کا استقبال نائب گورنر مکہ شہزادہ سعود بن مشعل بن عبد العزیز نے کیا۔
استقبال کرنے والوں میں وزیر تجارت ڈاکٹر ماجد القصبی، جدہ کے کمشنر صالح بن علی الترکی، جدہ پولیس کے سربراہ جنرل صالح الجابری ، انڈیا میں قائم مقام سعودی سفیر احمد الاحمری اور ریاض میں انڈین سفیر سہیل اعجاز خان شامل تھے۔
سعودی عرب کی حدود میں داخل ہوتے ہی سعودی فضائیہ کے جنگی طیاروں نے نریندر مودی کے طیارے کو حصار میں لے لیا۔
