’سعودی عرب سے ہارنے میں کوئی شرم نہیں،‘ شکست کے باوجود پاکستانی ٹیم کی تعریفیں

فُٹ بال ورلڈ کپ کوالیفائرز راؤنڈ 2 میں سعودی عرب نے پاکستان صفر کے مقابلے میں چار گول سے شکست دے دی ہے۔

جمعرات کو الاحسا کے الفتح کلب سٹیڈیم میں کھیلے گئے میچ میں صالح الشہری نے دو اور عبدالرحمان غریب اور عبداللہ ردیف نے ایک، ایک گول کیا۔

دونوں ٹیموں کے درمیان یہ میچ سوشل میڈیا پر گفتگو کا موضوع بنا رہا۔ صارفین کی جانب سے سعودی عرب اور پاکستان دونوں کی فُٹ بال ٹیموں کی تعریف کی جا رہی ہے۔

سوشل میڈیا پلیٹ فارم ’ایکس‘ پر ایک صارف نے میزبان ٹیم کی تعریف کرتے ہوئے لکھا کہ ’سعودی عرب نے ورلڈ کپ کے گروپ سٹیج میں ارجنٹائن کو شکست دی تھی اور پھر وہ ٹیم ورلڈ کپ جیت گئی۔‘

انہوں نے مزاح کا سہارا لیتے ہوئے لکھا ’تاریخ اپنے آپ کو دُہرا رہی ہے لیکن اس وقت ایسا پاکستان کے ساتھ ہو رہا ہے اس لیے پریشانی کی کوئی وجہ نہیں۔‘

منیب فرخ نے میچ پر تبصرہ کرتے ہوئے لکھا کہ ’جیسی توقع تھی ویسا ہی ہوا اور پاکستان میچ سعودی عرب سے ہار گیا لیکن یہاں بہت سی مثبت چیزیں بھی سامنے آئی ہیں۔‘

وہ مزید لکھتے ہیں کہ ’یہ پاکستانی کھلاڑیوں کے لیے اچھی سیکھ تھی۔‘

ایک اور ’ایکس‘ صارف نے لکھا کہ ’ایک سال کی مسلسل فٹ بال سے پاکستانی ٹیم میں بہت بہتری آئی ہے۔ سعودی عرب سے ہارنے میں کوئی شرم نہیں کیونکہ اُن کی ٹیم ہم سے بہت بہتر ہے لیکن سوچیں اگر پاکستان فُٹ بال فیڈریشن کا حال اچھا ہوتا پچھلی ایک دہائی میں تو ہم کہاں پہنچ سکتے تھے۔‘

اسرار احمد ہاشمی نے سوشل میڈیا صارفین کو بتانے کی کوشش کی کہ سعودی عرب فیفا فُٹ بال رینکنگ میں 57 ویں نمبر پر ہے جبکہ پاکستان کا اسی اینکنگ میں 193 واں نمبر ہے۔

انہوں نے مزید لکھا کہ ’ہاف ٹائم میں میچ کا سکور سعودی عرب 2 اور پاکستان صفر تھا لیکن پاکستان نے انجری ٹائم میں دو مزید کھا لیے۔‘

’یہ ایک اچھی کوشش تھی شاہینوں کی جانب سے۔‘

پاکستانی فٹ بال ٹیم ورلڈ کپ کوالیفائر راؤنڈ 2 کا دوسرا میچ 21 نومبر کو تاجکستان کے خلاف اسلام آباد میں کھیلے گی۔