’انڈیا 192 رنز تو نیند میں بھی بنا لیتا ہے‘، پاکستانی ٹیم تنقید کی زد میں

احمدآباد کے نریندر مودی سٹیڈیم میں پہلے بیٹنگ کرتے ہوئے پاکستان نے انڈیا کو جیت کے لیے رنز کا 192 ہدف دیا ہے اور سوشل میڈیا پر ایک نظر دوڑانے سے معلوم ہوتا ہے کہ شائقین کو گرین شرٹس کی جیتنے کی کوئی زیادہ امید نہیں۔

پاکستان نے جب اننگز کی شروعات کی تو ایسا لگ رہا تھا جیسے پاکستان اس میچ میں انڈیا کے خلاف کوئی بڑا سکور کرنے میں کامیاب ہوجائے گا لیکن امام الحق، بابر اعظم اور محمد رضوان کے علاوہ کوئی بھی پاکستانی بیٹر وکٹ پر نہیں ٹِک سکا۔

پاکستان کا ٹوٹل ایک وقت میں 30 ویں اوور میں 155 رنز پر تین کھلاڑی آؤٹ تھا اور پھر ٹیم کی باقی آٹھ وکٹیں  صرف 36 رنز پر گر گئیں۔

پاکستان کی جانب سے کپتان بابر اعظم نے 50 رنز، محمد رضوان نے 49 رنز اور امام الحق نے 36 رنز بنائے۔ ان بیٹرز کے علاوہ کوئی بھی پاکستانی کھلاڑی انڈین بولرز کے سامنے مزاحمت نہیں کرسکا۔

انڈیا کی جانب سے جسپریت بمراہ، محمد سراج، ہادرک پانڈیا، رویوندر جڈیجہ اور کلدیپ یادیو نے دو، دو وکٹیں حاصل کیں۔

سوشل میڈیا پر پاکستانی کرکٹ فینز کے تاثرات دیکھ کر لگتا ہے کہ وہ ہمت ہار چکے ہیں اور کھلاڑیوں پر طنز و مزاح کے نشتر برساتے ہوئے نظر آرہے ہیں۔

مونا فاروق نے پاکستانی بیٹرز کی ناقص کارکردگی پر تبصرہ کرتے ہوئے ایک ٹویٹ میں لکھا ’ایسے دنوں میں میں سوچتی ہوں کہ کاش میں کرکٹ فین نہ ہوتی۔‘

صبا بانو ملک نے انڈیا کی بیٹنگ کا خیالی نقشہ کھینچتے ہوئے لکھا ’انڈیا 192 رنز تو نیند میں بھی بنا لیتی ہے اور 300 رنز سنیک کھاتے ہوئے۔ بہت مایوس کُن کارکردگی۔‘

اینکرپرسن اقرار الحسن نے میچ کے حوالے سے پوچھا کہ ’اس موقع پر کونسا گانا یاد آ رہا ہے؟‘ زبیر علی خان نے اس کا جواب دیتے ہوئے لکھا کہ انہیں پنجاب پولیس کا ’کانسٹیبل شاہد یاد آ رہا ہے۔‘

سابق انڈیا فاسٹ بولر وینکاٹیش پرساد نے انڈین بولنگ کی تعریف کرتے ہوئے لکھا کہ یہ میچ اُن کی ٹیم باآسانی جیت جائے گی۔

صارفین ٹوئٹر پر انڈیا کپتان روہت شرما کی بھی تعریف کرتے ہوئے نظر آئے۔ ایک اکاؤنٹ کی جانب سے سابق انڈین کھلاڑی محمد کیف کا تبصرہ شیئر کیا گیا: ’صرف بولنگ میں تبدیلی نہیں بلکہ روہت شرما نے کامیاب ریویوز بھی لیے۔ انہوں نے اس بڑے میچ میں شاندار کپتانی دکھائی ہے۔‘

بروکن نیوز نامی اکاؤنٹ نے پاکستانی ٹیم پر طنز کرنے کے لیے اینکرپرسن جاوید چوہدری سے خیالی جملہ منسوب کرتے ہوئے لکھا ’ذکا اشرف انڈیا جاتے ہوئے ہماری دوائی لے جاتے تو نتائج مختلف ہوتے۔‘

خیال رہے پاکستان آج تک ون ڈے ورلڈ کپ میں انڈیا سے کوئی میچ نہیں جیت سکا ہے۔ اس میچ سے قبل دونوں ٹیمیں سات مرتبہ ورلڈ کپ میں آمنے سامنے آئی ہیں اور ہر مرتبہ انڈیا کی ٹیم ہی فاتح رہی ہے۔