سعودی وزیر دفاع شہزادہ خالد کی ابوظہبی میں امارات کے صدر سے تعزیت
اتوار 30 جولائی 2023 16:35
شیخ سعید بن زاید آل نہیان کے انتقال پر امارات میں تین روزہ سوگ کا اعلان ہے۔ فوٹو واس
سعودی عرب کے وزیر دفاع شہزادہ خالد بن سلمان بن عبدالعزیز نے ابوظہبی میں متحدہ عرب امارات کے صدر شیخ محمد بن زاید النہیان سے گذشتہ روز ہفتے کو ملاقات کی۔
عرب نیوز کے مطابق شہزادہ خالد بن سلمان نے ملاقات کے موقع پر شیخ محمد بن زاید النہیان سے ان کے بھائی شیخ سعید بن زاید النہیان کے انتقال پر دلی تعزیت کا اظہار کیا۔
متحدہ عرب امارات کے صدر کو گزشتہ تین دن سے کئی ممالک کے رہنماؤں اور سینئر حکام کی جانب سے تعزیتی پیغامات موصول ہو رہے ہیں۔
شیخ سعید بن زاید جو ابوظہبی کے حکمران کے نمائندے تھے اور کئی برسوں سے متعدد سرکاری عہدوں پر فائز رہے جمعرات کی صبح 58 برس کی عمر میں انتقال کر گئے تھے۔
شیخ سعید بن زاید آل نہیان کے انتقال پر متحدہ عرب امارات میں تین روزہ سوگ کا اعلان کیا گیا ہے جس کے باعث قومی پرچم سرنگوں ہے۔
