گائے نے ایک منٹ میں 10 کرتب دکھا کر عالمی ریکارڈ بنا لیا

انسان تو آئے روز کوئی نہ کوئی نیا ورلڈ ریکارڈ بناتے رہتے ہیں، لیکن جانور بھی اس دوڑ میں کسی سے کم نہیں ہیں۔

ہم اکثر بلیوں، کتوں، شیروں اور دیگر جانوروں کو کرتب کرتے دیکھ چکے ہیں، لیکن اگر یہ کہا جائے کہ گائے بھی کرتب کر سکتی ہے تو یہ کچھ غیر معمولی لگتا ہے۔

امریکہ میں ایک گائے نے صرف کرتب ہی نہیں دکھائے بلکہ ایک منٹ میں دس کرتب دکھا کر عالمی ریکارڈ بھی قائم کر دیا ہے۔

گنیز ورلڈ ریکارڈز کے مطابق ’گوسٹ‘ نامی چار سالہ گائے نے یہ ریکارڈ بنایا ہے جس کی مالکہ میگن ریمان ہیں۔

گائے نے ایک منٹ جو کرتب دکھائے ان میں ایک جگہ پر کھڑے رہنا، بلانے پر پاس آنا، جھکنا، دائرے میں گھومنا، پیڈسٹل پر کھڑے ہونا، ٹانگ اٹھانا، گھنٹی کو چھونا، منہ چومنا، سر کو ہلانا اور گلے میں رسا ڈلوانا شامل ہیں۔

میگن کا کہنا ہے کہ گائے اس کے علاوہ بھی کئی کرتب کر سکتی ہے جس میں رنگوں کی پہچان کرنا بھی شامل ہے۔

انہوں نے کہا کہ ’جب میں نے گوسٹ کو پہلی مرتبہ دیکھا تو لگا کہ اس میں کچھ خاص ہے اور یہ کچھ سپیشل کر سکتی ہے۔

میگن گھوڑوں کو کرتب کرنا سکھاتی ہیں اور انہوں نے سوچا کہ وہ اپنی گائے کو یہ کرنا سکھائیں گی۔