بگ بیش لیگ: چھت سے ٹکرانے والی شاٹ کو چھکا کیوں قرار دیا جاتا ہے؟

آسٹریلوی ٹی20 بگ بیش لیگ (بی بی ایل) میں رواں سیزن کئی دلچسپ واقعات دیکھنے میں آ ئے ہیں۔ سنیچر کو بھی اس وقت ایسا ہی ایک واقعہ پیش آیا جب گیند نے چھت کو جا چھوا۔

میلبرن کے ڈوک لینڈز سٹیڈیم میں میلبرن رینیگیڈز اور میلبرن سٹارز کے درمیان کھیلے گئے میچ میں سٹارز کی بیٹنگ کے دوران اوپنر بیٹر جو کلارک نے شاٹ کھیلی جس کے بعد گیند سٹیڈیم کے چھت پر جا لگی اور بیٹر کو چھکا دے دیا گیا۔

ڈوک لینڈز سٹیڈیم میں ضرورت پڑنے پر چھت کو جوڑ دیا جاتا ہے جس کے بعد میچ کھلے آسمان کے بجائے چھت کے نیچے کھیلا جاتا ہے۔

اس چھکے کے 12 اوور بعد میلبرن سٹارز کے بیئو ویبسٹر نے شاٹ کھیلی جس کے بعد گیند ایک مرتبہ پھر سے چھت سے ٹکرا گئی اور بیٹر کو چھکا دے دیا گیا۔

لیگ کے قانون 19.7.1 کے مطابق اگر گیند سٹیڈیم پر بنے ہوئے چھت کے کسی حصہ کو ٹکرا گئی تو چھکا دیا جائے گا۔

یہ اپنی نوعیت کے نئے یا اکیلے واقعات نہیں بلکہ سنہ 2012 میں آسٹریلوی بیٹر ایرون فنچ نے بھی اسی قسم کی شاٹ کھیل کر چھ رنز حاصل کیے تھے تاہم اس گیند کو ڈیڈ بال قرار دیا گیا تھا۔ اس کے بعد کرکٹ آسٹریلیا نے اس قانون کو تبدیل کرتے ہوئے ایسے موقع پر بلے باز کو چھ رنز دینے کا فیصلہ کیا۔

بگ بیش لیگ کے اس انوکھے قانون پر سماجی رابطوں کی ویب سائٹ ٹوئٹر پر صارفین نے بھی اپنے اپنے انداز میں تبصرے کیے ہیں۔

ویسٹ انڈین کھلاڑی عقیل حسین نے اپنی ٹویٹ میں کہا کہ 'اس چھت والے قانون کو ختم کرنا ہوگا، اگر گیند سیدھی اوپر جا رہی ہے تو اسے چھکا نہیں دیا جا سکتا۔'

 ساوربھ ملہوترا نے لکھا کہ 'بیٹر کو چھکا مل گیا کیونکہ گیند چھت پر لگ گئی تھی جبکہ اگر چھت نہ ہوتا تو شاید بیٹر آؤٹ ہو جاتا۔'

کرک 18 کہتے ہیں کہ 'دو دفعہ گیند چھت کو لگی اور اسے چھکا دیا گیا، چھت کے بغیر یہ وکٹیں تھیں۔'

اومکار منکامے نے ٹویٹ کی کہ 'پہلے اسے ڈیڈ بال قرار دیا جاتا تھا، جب ایرون فنچ نے چھت پر چھکا لگایا تو تب اس قانون کو تبدیل کیا گیا ہے، اس کی ٹیم کو اس وجہ سے آج دو چھکے پڑ گئے ہیں۔'