سعودی سفیر کی شہزادہ محمد بن سلمان کی تصویر ٹرک پر لگانے والے پاکستانی ٹرک ڈرائیور سے ملاقات

پاکستان میں سعودی عرب کے سفیر نواف سعيد المالكی نے ولی عہد شہزادہ محمد بن سلمان کی تصویر اپنے ٹرک پر آویزاں کرنے والے پاکستانی ٹرک ڈرائیور سے ملاقات کی ہے۔

پیر کو سعودی سفارت خانے نے ایک ٹویٹ میں اس ملاقات کے حوالے سے کہا کہ ’سفیر جناب نواف سعيدالمالكی نے آج محترم نواز اختر سے ملاقات کی جنہوں نے شہزادہ محمد بن سلمان بن عبدالعزیز آل سعود کی تصویر کی پینٹنگز اپنے ٹرک پر آویزاں کر کے شہزادہ محمد اورسعودی عرب کی قیادت سے اپنی گہری محبت کا اظہار کیا تھا۔‘

واضح رہے کہ پشاور کے ٹرک ڈرائیور نواز اختر نے سعودی عوام اور ولی عہد شہزادہ محمد بن سلمان سے اپنی محبت کا اظہار کرتے ہوئے اپنے ٹرک پر ولی عہد کی تصویر لگائی تھی۔

مرکزی جمعیت اہل حدیث پاکستان نے اپنے ٹوئٹر اکاؤنٹ سے اس ٹرک کی تصویر اور ویڈیو پوسٹ کی تھی۔

گاڑیوں اور عوامی سڑکوں پر تصاویر اور بینرز لگانا ایک ایسا کلچر ہے جو پاکستانی عوام کے جذبات، بعض سماجی، سیاسی اور دیگر اہم واقعات کا اظہار کرتا ہے۔