شاہین شاہ آفریدی کو ’میدان میں واپس دیکھنا کتنا حسین نظارہ ہے‘

آسٹریلیا میں جاری ٹی20 ورلڈ کپ کے وارم اپ میچ میں پاکستان کرکٹ ٹیم کے فاسٹ بولر شاہین شاہ آفریدی ایک طویل وقفے کے بعد ایکشن میں نظر آئے۔

انگلینڈ کے خلاف برسبین میں کھیلے گئے وارم اپ میچ میں شاہین شاہ آفریدی نے دو اوورز کروا کر سات رنز دیے۔

شاہین شاہ آفریدی کے علاوہ انگلینڈ کے خلاف ٹی20 وارم اپ میچ میں محمد حسنین، نسیم شاہ اور محمد وسیم نے بھی بولنگ کی ہے۔

انگلینڈ کے خلاف میچ میں کپتان بابر اعظم اور محمد رضوان نے آرام کیا جبکہ شاہین شاہ آفریدی بھی دو اوورز کروانے کے بعد واپس پویلین چلے گئے۔

شاہین شاہ آفریدی جولائی میں سری لنکا کے خلاف ٹیسٹ میچ کے دوران ڈائیو مارتے ہوئے انجری کا شکار ہوگئے تھے جس کے باعث وہ نیدرلینڈز کے خلاف ون ڈے سیریز، ایشیا کپ اور انگلینڈ کے خلاف ٹی20 سیریز سے باہر ہوگئے تھے۔

شاہین شاہ آفریدی برطانیہ میں اپنا علاج کروانے کے بعد مکمل صحت یاب ہوکر ٹی20 ورلڈ کپ کھیلنے والی ٹیم میں شامل ہوچکے ہیں۔

23 اکتوبر کو انڈیا کے خلاف پاکستانی ٹیم میں شاہین آفریدی، نسیم شاہ اور حارث رؤف کے کھیلنے کا امکان ہے۔

جس کے بعد یہ پہلا موقع ہوگا کہ تینوں فاسٹ بولر ٹیم میں اکٹھے کھیلیں گے۔

شاہین شاہ آفریدی کے واپس آنے پر سماجی رابطوں کی ویب سائٹ ٹوئٹر پر پاکستان کرکٹ ٹیم کے مداحوں میں خوشی کا سماں ہے۔

ایمن سہیل کہتی ہیں کہ ’شاہین شاہ آفریدی کو میدان میں واپس دیکھنا کتنا حسین نظارہ ہے۔‘

حسن چیمہ لکھتے ہیں کہ ’میں صرف یہ چاہتا ہوں کہ شاہین 90 ہزار تماشائیوں کے سامنے روہت شرما کی وکٹ اڑا دے، میں عام سا آدمی ہوں، میں صرف یہی چاہتا ہوں۔‘

حارث نے لکھا کہ ’صبح کے چھ بج رہے ہیں، خدا گواہ ہے کہ مجھے شاہین شاہ آفریدی کو دیکھنے کی ضرورت تھی۔‘

ماہ نور نے کہا کہ ’شاہین شاہ کو پہلا اوور کرتے دیکھ کر بہت زیادہ خوشی ہوئی ہے۔‘