کیا عمران خان ایک ’غیر روایتی سیاست دان‘ ہیں؟

پاکستان کے ٹی وی چینل جیو نیوز کے ایک پروگرام پر بشریٰ انصاری اور ٹی وی ہوسٹ منیب فاروق بیٹھے تھے اور پروگرام کے میزبان تابش ہاشمی نے عمران خان سے متعلق سوال کیا اور اب اس سوال اور مہمانوں کے جوابات کا ویڈیو کلپ سوشل میڈیا پر وائرل ہو گیا ہے۔

سوال تھا کہ کیا پاکستان تحریک انصاف (پی ٹی آئی) کے سربراہ عمران خان ایک روایتی سیاست دان ہیں؟ اس سوال کا جواب دیتے ہوئے منیب فاروق نے کہا ’ہر کام ان کا غیر روایتی ہے۔ اپوزیشن میں تھے تب بھی، حکومت میں آئے تب بھی اور حکومت سے نکلنے کے بعد بھی جو ان کا طرز عمل ہے وہ انہیں ایک غیر روایتی سیاست دان بناتا ہے۔‘

منیب نے مزید کہا کہ ’تھوڑا سا کوئی ٹھہراؤ ہوتا ہے یا رکاوٹ ہوتی ہے نہ کہ بہت ساری باتیں آپ نہیں کرتے لیکن عمران خان صاحب کا یہ ہے کہ اللہ نے ان کو عزت دی اور پھر انہوں نے اس پر کیپیٹلائز کیا۔‘

منیب نے عمران خان کی مقبولیت پر تبصرہ کرتے ہوئے کہا کہ ’آپ ان پر کوئی چیز پھینکیں گے تو وہ چیز رکے گی نہیں بلکہ پھسل کر نیچے آجائے گی۔‘

منیب فاروق کے اس جواب پر اداکارہ بشریٰ انصاری نے ان سے اختلاف کرتے ہوئے کہا کہ ’سیاست کی جو روایات اب تک چلتی رہی ہیں کسی ایک کو بھی ہم ماڈل نہیں بناسکتے کہ وہ روایات تھیں اور یہ (عمران خان) غیر روایتی ہیں۔‘

انہوں نے منیب کے جواب پر سوالات اٹھاتے ہوئے کہا کہ ’کیا ہماری روایات وہی ہیں جو 70 یا 75 سال سے چلی آرہی ہیں؟ اگر اس شخص کو ہم کہہ دیں کہ وہ غیر روایتی ہے تو پھر روایتی لوگ کون ہیں؟ کیا روایتی لوگوں کی روایات سے ہم اتفاق کرتے ہیں؟‘

سوشل میڈیا پر یہ ویڈیو کلپ وائرل ہے اور صارفین اس پر اپنی رائے بھی دے رہے ہیں۔

مریم ملک نے ایک ٹویٹ میں بشریٰ انصاری سے متعلق لکھا ’انہوں نے جو کہا اس سے ہٹ کر دیکھا جائے تو یہ نوٹس کیا جاسکتا ہے کہ بشریٰ انصاری نے کتنی شائستگی سے اختلاف کیا اور غصے میں آئے بغیر یا ساتھی مہمان کی بے عزتی کیے بغیر اپنے نقطے کا اظہار کیا۔‘

انس حفیظ نامی صارف نے ایک ٹویٹ میں لکھا ’بشریٰ انصاری نے اپنے آرگومنٹ سے منیب فاروق کو لاجواب کردیا۔‘

سعد درانی نے بشریٰ انصاری کے ’حسن بیاں‘ کی تعریف کرتے ہوئے لکھا کہ ’کاش میرے پاس وہ زبان ہوتی جو بشریٰ انصاری ویڈیو میں استعمال کررہی ہیں۔‘

واضح رہے بشریٰ انصاری نے اپنے فنی کریئر کا آغاز کم عمری میں 1950 کی دہائی میں کیا تھا اور اپنے چھ دہائیوں سے زیادہ پر محیط کریئر میں وہ متعدد ایوارڈز جیت چکی ہیں جس میں صدارتی ایواڈ برائے حسن کارکردگی بھی شامل ہے۔