سعودی وزیر خارجہ سے مختلف ملکوں کے وزرائے خارجہ کی ملاقاتیں

سعودی وزیر خارجہ شہزادہ فیصل بن فرحان نے بدھ کو مراکش میں رومانیہ، جمہوریہ چیک، سپین، عراق، ناروے، مراکش، بحرین اور پرتگال کے وزرائے خارجہ سے ملاقات کی ہے۔

شہزادہ فیصل بن فرحان داعش کے خلاف عالمی اتحاد کے اجلاس میں شرکت کے لیے مراکش میں ہیں۔ 

سرکاری خبر رساں ایجنسی ایس پی اے کے مطابق رومانیہ اور سعودی عرب کے وزرائے خارجہ نے دونوں ملکوں کے تعلقات، انہیں فروغ دینے کے طریقوں اور مشترکہ مفادات کے حصول میں معاون تدابیر پر تبادلہ خیال کیا ہے۔

باہمی دلچسپی کےعلاقائی و بین الاقوامی حالات پر بھی بات چیت کی ہے۔ 

اس موقع پر مراکش میں متعین سعودی سفیرعبداللہ بن سعد الغریری اور وزیر خارجہ کے دفتر کے ڈائریکٹر جنرل عبدالرحمن الداود بھی موجود تھے۔ 

علاوہ ازیں سعودی وزیر خارجہ سے جمہوریہ چیک، عراق، بحرین، ناروے مراکش، پرتگال اور سپین کے وزرائے خارجہ نے الگ الگ ملاقاتیں کرکے سعودی عرب کے ساتھ  دوطرفہ تعلقات کو فروغ دینے کے طریقوں پر تبادلہ خیال کیا ہے۔

وزرائے خارجہ نے باہمی دلچسپی کے علاقائی و بین الاقوامی امور پر بھی بات چیت کی ہے۔