’اب ہو گا حساب برابر‘ پاکستان، انڈیا میچ سے متعلق ویڈیو وائرل

کاروباری حساب کتاب سے متعلق پاکستانی موبائل ایپلیکیشن کی جانب سے بنائی گئی ایک ایسی ویڈیو سوشل ٹائم لائنز پر وائرل ہوئی ہے جو مسائل سے بچنے کے لیے ’پرانے طور طریقوں کے بجائے‘کچھ نیا کرنے کی ترغیب دے رہی ہے۔

پاکستان اور انڈیا کے درمیان ٹی 20 ورلڈ کپ کے بڑے میچ سے قبل سامنے آنے والی ویڈیو میں ایک ’انڈین اینکر‘ اور ’انڈیا میں پاکستانی جاسوس کبوتر کی گرفتاری‘ کی تھیمز کو استعمال کیا گیا ہے۔

ایک منٹ سے کچھ زیادہ دورانیے کی ویڈیو میں ایک بزرگ تاجر کو دکھایا گیا ہے جو اپنے کاروبار کے حساب کتاب اور اس سے متعلق پیغام رسانی کے لیے کبوتر کو استعمال کرتے ہیں۔

کبوتر کے پاؤں سے باندھا گیا پیغام اس وقت بڑا مسئلہ بن جاتا ہے جب پرندہ باڑ کی دوسری طرف جا اترتا ہے، وہاں موجود ایک فوجی دکھائی دینے والا فرد اس کے قریب آتا دکھائی دیتا ہے۔

اس کے بعد کے مناظر میں ٹیلی ویژن پر ’جرنب گوسوامی‘ نامی ایک اینکر کو انتہائی جذباتی انداز میں ’خلاصہ‘  پیش کرتے دکھایا گیا ہے۔ یہ اینکر کبوتر اور اس کے پاؤں سے بندھے پیغام کا ذکر کرتے ہوئے کہتا ہے کہ پاکستان اور انڈیا کے میچ سے قبل حساب کا ذکر کیوں؟ آخر میں ہاتھ میں موجود کاغذات کو پھاڑتا اور پھر چلاتے ہوئے سوال کرتا ہے کہ قوم جاننا چاہتی ہے۔

اس مرحلے پر بزرگ تاجر کو پریشانی کی حالت میں دکھایا جاتا ہے اور پس منظر میں سنائی دینے والی آواز کہتی ہے ’پرانے طور طریقے استعمال کریں گے تو ایسا تو ہو گا۔‘

پاکستان اور انڈیا کے درمیان کرکٹ میچ کا کوئی بھی موقع ہو یہ کرکٹ شائقین کے ساتھ ساتھ کارپوریٹ برانڈز کو بھی آمنے سامنے لا کھڑا کرتا ہے۔ ایسے میں جہاں انڈین برانڈز کی جانب سے مختلف اشتہارات کے ذریعے اپنی ٹیم کو بالاتر اور مخالف کو کم تر بنا کر پیش کیا جاتا ہے وہیں پاکستانی برانڈز بھی اپنے کھلاڑیوں کی حمایت کا کوئی موقع ضائع نہیں جانے دیتے۔

پاکستانی شہر فیصل آباد کے ایک نوجوان کی بنائی گئی موبائل ایپ کی جانب سے حالیہ اشتہار بھی انڈیا و پاکستان کے درمیان کرکٹ کا میدان سجنے سے قبل میچ سے متعلق ہونے والی گفتگو کا حصہ ہے۔ ویڈیو نے کرکٹ شائقین کے ساتھ ساتھ دیگر سوشل میڈیا صارفین کو اپنی جانب متوجہ کیا تو پاکستان، انڈیا میچ سے متعلق ڈسکشن مزید جذباتی رنگ اختیار کر گئی۔

سیدہ عمارہ نامی ہینڈل نے لکھا کہ ’پاکستان ہی جیتے گا، حساب جو برابر کرنا ہے۔‘

پاکستان اور انڈیا کے میچ سے متعلق توقعات اور اس کے ممکنہ نتیجے پر ہونے والی گفتگو نے ویڈیو کی تھیم اور اس میں پیش کیے گئے مزاح کا رخ کیا تو اس سے محظوظ ہونے والے پروڈیوسرز کو سراہتے رہے۔

پاکستانی کرکٹ ٹیم کے کپتان بابراعظم کی تصویر ڈی پی پر لگائے ہوئے ایک اکاؤنٹ نے لکھا کہ ’ہم پاکستانی عوام میں میں حس مزاح پیدائشی طور پر موجود ہے۔‘

ٹی 20 ورلڈ کپ کے سپر 12 مرحلے کے میچ سنیچر کو آسٹریلیا اور جنوبی افریقہ کے درمیان مقابلے سے شروع ہو چکے ہیں۔ اسی سلسلے کا اہم مقابلہ اتوار 24 اکتوبر کو پاکستان اور انڈیا کے درمیان دبئی کے انٹرنیشنل کرکٹ سٹیڈیم میں شام سات بجے منعقد ہو گا۔