نواز شریف کی لائیو تقریر کے دوران چائے کی چُسکی، ’شاید چائے مزیدار نہیں تھی‘

گوجرانولہ میں مسلم لیگ نواز کے سوشل میڈیا کنونشن کے دوران سابق وزیراعظم نواز شریف کی چائے پیتے ہوئے ویڈیو سوشل میڈیا پر وائرل ہو گئی جس کے بعد حسب سابق مداحوں اور مخالفین کے دلچسپ تبصروں کا ایک لامتناہی سلسلہ شروع ہوگیا۔

نواز شریف کی تقریر یوں تو میڈیا پر کہیں نہیں دکھائی گئی مگر ٹوئٹر پر اس پندرہ سیکنڈ کی ویڈیو کو وزیراعظم کے معاون خصوصی برائے سیاسی ابلاغ شہباز گل نے شئیر کیا۔

ویڈیو میں دیکھا گیا ہے کہ نواز شریف سوشل میڈیا پر لائیو سٹریم ہونے والی تقریر کے اختتام پر سامنے رکھے چائے کے کپ سے ایک چسکی لیتے ہیں اور پھر  چائے پیش کرنے والے کسی شخص سے یوں مخاطب ہوتے ہیں ’تم نے پوچھ تو لینا تھا ایسی ہی پکڑا کر رکھ دی۔ تمھیں پتا ہے ناں میں تقریر کر رہا ہوں تم نے کیوں رکھی ہے؟‘

 اس کے ساتھ ہی ان کے چہرے پر ناگواری کے تاثرات ابھرتے ہیں اور وہ اپنے کالر سے مائیک اتار دیتے ہیں۔

ٹوئٹر پر یہ ویڈیو شئیر کرتے ہوئے وزیراعظم کے معاون خصوصی برائے سیاسی ابلاغ شہباز گل نے فقرہ کسا ’تقریر کے دوران صرف پرچی اور کچھ نہیں۔‘

شاید ان کا طنز نواز شریف کا ماضی میں لکھی ہوئی تقریر یا ٹالکنگ پوائنٹس پر انحصار پر تھا تاہم ان کی ٹویٹ پر تبصروں کا سلسلہ شروع ہو گیا۔

شیخ صفینہ نامی صارف نے طنز کیا کہ عمران خان اور ان کے مشیر چھپ چھپ کر نواز شریف کی تقریریں سنتے ہیں۔

تابش نامی ایک صارف نے انڈٖین پائلٹ ابھی نندن کے پاکستانی حراست میں چائے پی کر مشہور زمانہ تبصرے کا حوالہ دیتے ہوئے لکھا کہ ’جب چائے مزیدار نہ ہو تو ایسے تاثرات دیے جاتے ہیں۔‘

ایک اور صارف نازش اختر نے تبصرہ کیا کہ ’حکومتی مشیر تو کہتے ہیں نواز شریف کی سیاست ختم ہو گئی ہے تو پھر اس کے ایک ایک عمل پر تبصرہ کیوں؟‘

ایک اور صارف سرمد حمید نے لکھا کہ ’میاں صاب کے "شڑپ" نے ابھی نندن کی یاد تازہ کر دی ہے۔‘