لاہور: گزشتہ روز لندن سے براستہ ابوظبی پاکستان واپس آنے والے سابق وزیرا عظم اور ن لیگ کے قائد میاں نواز شریف کے استقبال کے لیے بلا اجازت ریلی نکالنے اور اس دوران ہنگامہ آرائی کے الزام میں ن لیگ کے سیکڑوں رہنماؤں اور کارکنوں پر دہشت گردی ایکٹ سمیت دیگر سنگین جرائم میں مقدمات درج کرلیے گئے ہیں۔
نجی ٹی وی کے مطابق صوبہ پنجاب کے مختلف علاقوں میں ن لیگ کی اعلیٰ قیادت اور کارکنوں کے خلاف مقدمات درج کیے گئے ہیں۔ اس حوالے سے لاہور میں ریلی نکالنے کے الزام میں لوہاری گیٹ تھانے میں شہباز شریف، حمزہ شہباز، جاوید ہاشمی، عظمیٰ بخاری، سائرہ افضل تارڑ، مریم اورنگزیب، کامران مائیکل، کرنل (ر) مبشر، راجا ظفر الحق اور مشاہد حسین سید سمیت درجنوں رہنماؤں اور کارکنوں کے خلاف مقدمہ درج کیا گیا ہے۔ ایس ایچ او کی مدعیت میں درج کیے گئے مقدمے میں انسداد دہشت گردی ایکٹ کی دفعہ 7، اقدام قتل اور دیگر سنگین جرائم کی دفعات شامل کی گئی ہیں۔
دوسری جانب تھانہ نواب ٹاؤن میں اقدام قتل، دہشت گردی، توڑ پھوڑ اور دیگر سنگین دفعات کے تحت درج کیے گئے مقدمے میں سیف الملوک کھوکھر، ملک شفیع کھوکھر، ملک افضل کھوکھر، ملک عرفان کھوکھراور شہباز ڈوگر کے علاوہ 500 نامعلوم افراد کو نامزد کیا گیا ہے ۔ شمالی کینٹ تھانے میں سابق وزیراعظم شاہد خاقان عباسی، شہباز شریف کے پولیٹیکل سیکرٹری طلحہ برکی اور سابق وزیر صحت خواجہ سلمان رفیق کے خلاف مقدمہ درج کیا گیا ہے ۔
گجرات میں مسلم لیگ (ن) کے رہنماؤں اور کارکنوں کے خلاف 4 مختلف تھانوں میں مقدمات درج کیے گئے ہیں، ان مقدمات میں 96 ملزمان نامزد جب کہ 655 افراد نامعلوم ظاہر کیے گئے ہیں۔ ان مقدمات میں دفعہ 144 کی خلاف ورزی، اقدام قتل، فائرنگ، پولیس اہلکاروں کی وردی پھاڑنے اور کار سرکار میں مداخلت سمیت متعدد دفعات شامل کی گئی ہیں۔ پولیس نے ان مقدمات میں کئی لیگی رہنماؤں کو بھی حراست میں لے لیا ہے ، جن میں سابق مشیر وزیراعلیٰ پنجاب نوابزادہ طاہر، سابق ارکان قومی و صوبائی اسمبلی عابد رضا، مبشرحسین، نوابزادہ حیدر مہدی، شبیر کوٹلہ اور معین نواز شامل ہیں۔
سرگودھا میں بلا اجازت ریلی نکالنے اور ہوائی فائرنگ کرنے کے الزام میں 22 (ن) لیگی کارکنان کو گرفتار کرکے ان کے خلاف مقدمہ درج کرلیاگیا ہے ۔ پولیس کا کہنا ہے کہ گرفتار ملزمان کے خلاف بلا اجازت ریلیاں نکالنے اور قانون کی خلاف ورزی کرنے پر سخت کارروائی عمل میں لائی جائے گی۔
