سعودی عرب کی جانب سے غزہ میں اسرائیلی فوجی کارروائیوں میں اضافے کی مذمت

سعودی عرب نے شمالی اور جنوبی غزۃ میں اسرائیلی فوجی کارروائیوں میں اضافے کی شدید مذمت کرتے ہوئے اسے علاقے کے بڑے حصے پر قبضے میں توسیع قرار دیا ہے۔

ایس پی اے کے مطابق وزارت سے جاری بیان میں کہا گیا کہ’ یہ کارروائیاں بین الاقوامی برادری کی منشا کے منافی، انسانی حقوق کے قوانین اور اقوام متحدہ کے چارٹر کی خلاف ورزی ہیں۔ خطے میں امن واستحکام کے حصول کی کوششوں میں رکاوٹ ہیں۔‘

وزارت خارجہ نے سعودی عرب کی جانب سے اسرائیلی فورسز کی جانب سے کی جانے والی تمام زمینی کارروائیوں کی شدید مذمت کا اعادہ کیا۔

بیان میں خبردار کیا گیا کہ’ اس طرح کے اقدامات سے فلسطینی شہریوں کی زندگیوں کو خطرہ لاحق ہے۔ محصور انکلیو میں پہلے سے سنگین انسانی حالات میں مزید خراب ہوگی۔‘

بیان میں صریح اور بلاجواز خلاف ورزیوں کے تسلسل سے بھی خبردار کیا اور زور دیا کہ ’یہ بین الاقوامی قانون کی خلاف ورزی اور فلسطینی عوام کے حقوق پر براہ راست حملہ ہے۔‘

یاد رہے کہ اسرائیل نے غزہ میں اپنی فوجی کارروائی کو توسیع دی ہے ۔ جمعرات سے اب تک سینکڑوں شہریوں کی ہلاکت ہو چکی ہے۔

اس سے قبل تل ابیب کی جانب سے غزہ کے بعض علاقوں پر ’آپریشنل کنٹرول‘ حاصل کرنے کے لیے زمینی کارروائی کا تیاری کا کہا گیا تھا۔