عرب نیوز کے مطابق مریم عتیق کا تجربہ 15 برس پر محیط ہے اور وہ سعودی پکوانوں کو آج کل کے بین الاقوامی اور دل موہ لینے والے انداز میں پیش کرتی ہیں لیکن سعودی کُزین کے اصل خاصے پر کوئی سمجھوتہ نہیں کرتیں۔
مریم عتیق کی نظر میں سعودی کُزین محض کھانے کی ترکیبوں کا مجموعہ نہیں بلکہ یہ ’اجزا اور ذائقوں کا ایک سمندر ہے، جسے مملکت کے قدرتی وسائل سے مالا مال جغرافیے اور ثقافتی رنگا رنگی نے ایک نئی صورت دے دی ہے۔‘
وہ کہتی ہیں کہ ’اس میں جو گہرائی ہے وہ سعودی کھانوں کو ان کا امتیازی کردار دیتی ہے اور یہی آگے چل کر ثقافتوں کے درمیان پُل کا کام کرتا ہے۔‘
مقامی اور بین الاقوامی نمائشوں میں اکثر شرکت کے باعث مریم عتیق نے اپنی آنکھوں سے دیکھا ہے کہ سعودی ذائقے دنیا بھر کے لوگوں کو کس طرح اپنا گرویدہ بنا لیتے ہیں۔
سعودی کُزین محض کھانے کی ترکیبوں کا مجموعہ نہیں بلکہ یہ ’اجزا اور ذائقوں کا ایک سمندر ہے (فوٹو: عرب نیوز)
انھیں یاد ہے کہ جب ایک 90 برس کے شخص سے ان کا آمنا سامنا ہوا جنھوں نے ایک نمائش میں پہلی بار جریش (گندم، دہی، فرائی کردہ پیاز اور گوشت سے بننے والی سعودی ڈش) کو چکھا۔ جس طرح وہ اس ڈش سے متاثر ہوئے، ان کا یقین مزید پختہ ہوگیا کہ سعودی کھانوں کو عالمی طور پر پسند کیا جاتا ہے۔
عرب نیوز سے بات کرتے ہوئے انہوں نے کہا ’کھانا ثقافت کا سفیر ہوتا ہے۔سعودی ذائقوں اور اجزا کو، کھانا پیش کرنے کے عالمی طریقوں کے ساتھ ملا دیا جائے تو اس سے سعودی کُزین دوسروں تک جلدی پہنچ جاتا ہے اور عالمی ذوق کے لیے پسندیدہ بن جاتا ہے۔‘
مریم عتیق نے وزارتِ ثقافت اور کلنری آرٹ کمیشن کی تعریف کی اور کہا کہ’ ان کی کوششوں سے سعودی کھانوں کی میراث دستاویزی شکل میں محفوظ ہو رہی ہے۔‘
انھوں نے خود بھی مملکت کے دو علاقوں سے روایتی سعودی کھانوں کی ترکیبیں کو تحریری شکل دی ہے۔
سعودی خاتون شیف کا کہنا تھا پکوان ثقافت کا سفیر ہوتا ہے (فوٹو: عرب نیوز)
انھوں نے اس حوالے سے آن لائن پلیٹ فارموں کے کردار پر زور دیا اور کہا کہ ’ایسے پلیٹ فارم سعودی کھانوں کو عالمی سطح تک متعارف کرانے میں مددگار ثابت ہو رہے ہیں۔‘
انھوں نے میڈیا میں کام کرنے والوں اور کانٹینٹ بنانے والوں سے کہا کہ’ وہ اس ’ثقافتی مشن‘ میں حصہ لیں جس کا عتیق خود بھی اہم حصہ ہیں۔‘
’میں سعودی کُزین کو دنیا تک پہنچانے میں اپنی کوششیں جاری رکھوں گی، جس میں ہمارے مستند ذائقے ہیں اور جن میں ہماری ثقافت کی روح دوڑتی ہے۔ میں اس کُزین کو ثقافتی سفیر بنانا چاہتی ہوں جو مملکت کی گونا گوں خصوصیات اور شان کا مستحق ہے۔‘
الحساوی چاول سے اطالوی ڈش تیار کرنے والی خاتون سعودی شیفNode ID: 791651
