مصر میں شوہر نے بچوں کے سامنے بیوی کو پانچویں منزل سے پھینک دیا

مصر کی شمالی کمشنری القلیویہ کے شہر العبور الجدیدہ میں ایک شخص نے غصے میں آکر بچوں کے سامنے بیوی کو پانچویں منزل سے پھینک دیا جس سے وہ موقع پر ہی ہلاک ہو گئی۔

العربیہ کے مطابق اہل محلہ نے واقعے کی اطلاع  قریبی پولیس سٹیشن کو دی۔

اطلاع ملتے ہی پولیس جائے وقوعہ پر پہنچ گئی، نعش اپنی تحویل میں لے کر ہسپتال منتقل کردی۔

ابتدائی پولیس رپورٹ کے مطابق ملزم کا بیوی سے کسی بات پر جھگڑا ہوا جو اتنا بڑھا کہ اس نے طیش میں آکر بچوں کی موجودگی میں ہی بیوی کو پانچویں منزل سے نیچے پھینک دیا۔

پراسیکیوشن میں ملزم کو چار روزہ جسمانی ریمانڈ پر پولیس کی تحویل میں دیا ہے جبکہ نعش کو تدفین کے لیے ورثا کے حوالے کر دیا گیا۔