سعودی امدادی ایجسی شاہ سلمان مرکز کے سربراہ ڈاکٹرعبداللہ الربیعہ نے تیونس کے صدر قیس سعید سے ملاقات کی ہے۔

سرکاری خبر رساں ایجنسی ایس پی اے کے مطابق ملاقات میں انسانی ہمدردی اور امدادی امور پر تبادلہ خیال کیا گیا۔

تیونسی صدر نے سعودی عرب اور تیونس کے درمیان مضبوط تعلقات کو سراہا انہوں نے جڑے ہوئے بچوں کی علیحدگی کے سعودی پروگرام کی بھی تعریف کی۔

شاہ سلمان مرکز کے سربراہ نے تیونس کے وزیر صحت ڈاکٹر مصطفی فرجانی سے بھی ملاقات کی جس میں انسانی ہمدردی کے امور پر بات چیت کی گئی۔

تیونسی وزیر صحت نے دنیا بھر میں لوگوں کی مدد کےلیے سعودی ایجنسی کے ذریعے مملکت کی انسانی ہمدردی کی کوششوں کو سراہا۔

یاد رہے مئی 2015 میں اپنے آغاز کے بعد سے شاہ سلمان مرکز نے 311 سے زیادہ تنظیموں کے ساتھ شراکت داری میں 106 ملکوں میں 7.9 ارب ڈالر سے زیادہ مالیت کے تین ہزار 400 منصوبوں پر عملدرآمد کیا ہے۔