لیز پر گاڑیوں کی جامع انشورنس پالیسی، ضوابط میں ترمیم کیا ہے؟

سعودی عرب میں انشورنس اتھارٹی نے لیز (اقساط) پرفروخت کی جانے والی گاڑیوں کی جامع انشورنس پالیسی کے ضوابط میں ترمیم کی تجویز پیش کی ہے جس سے مالک اور ڈرائیور کے علاوہ ان سے منسلک دیگر افراد بھی مستفیض ہوسکیں گے۔

عکاظ کے مطابق تجویز میں شق نمبر11 کے دوسرے باب میں تبدیلی کی سفارش کی گئی ہے جو صرف نامزد ڈرائیور سے ہی متعلق تھا جس کا نام انشورنس پالیسی میں شامل کیا گیا ہو۔

پیش کی جانے والی تجویز میں شق میں تبدیلی کرکے اسے لیز پر گاڑی لینے والے، ڈرائیور اور ان سے منسلک افراد یعنی والد، والدہ، اہلیہ، شوہر، بیٹا، بیٹی، بھائی، بہن اور ڈرائیور جو لیز پرلینے والے کی کفالت میں ہو کو بھی شامل کیا گیا ہے۔

 ضوابط کی شق نمبر 2 کے پیراگراف 5  میں کہا گیا کہ پالیسی لینے سے قبل صارف کو کم از کم تین انشورنس کمپنیوں کی جانب سے کوٹیشن لینے کا اختیار ہوگا جس کا موازانہ کرنے کے بعد وہ اپنے لیے جو بہتر پالیسی ہو اس کا انتخاب کرسکے گا۔