تیونس میں سکول کی دیوار گرنے سے 3 طلبہ ہلاک، متعدد زخمی

تیونس میں سکول کی دیوار گرنے سے 3 طالب علم ہلاک و دیگر زخمی ہوگئے۔ طلبہ گراؤنڈ میں ڈرل کررہے تھے کہ اچانک دیوار گر گئی۔

العربیہ نیوز کے مطابق سکول کی دیوار گرنے کے واقعے پر تیونس میں لوگوں کا کہنا ہے کہ علاقے کے تعلیمی اداروں کی عمارتیں کافی بوسیدہ ہو چکی ہیں جبکہ ان کی مرمت بھی نہیں ہوتی جس کی وجہ سے یہ سانحہ پیش آیا۔

تیونس کی کمشنری سیدی بوزید میں واقع قدیم سکول کی دیوار تیز ہوا کا دباؤ برداشت نہ کرسکی جس کی وجہ سے وہ زمین بوس ہوگئی۔

رکن پارلیمنٹ بدرالدین القمودی نے ریجنل ادارہ تعلیم  کو اس کا ذمہ دار قرار دیتے ہوئے کہا ہے کہ دیوار کافی پرانی تھی جو گزشتہ ہفتے آنے والے زلزلے کی وجہ سے مزید کمزور ہوچکی تھی۔ ان کا مزید کہنا تھا کہ دیوار کی حالت کے بارے میں متعدد بار نشاندہی کرتے ہوئے اسے دوبارہ تعمیر کرنے کا کہا گیا تھا۔

دوسری جانب سکول کے طلبہ نے اس سانحے کے ذمہ داروں سے تحقیقات کا مطالبہ کیا ہے جن کی وجہ سے ان کے ساتھی ہلاک و زخمی ہوئے۔