سعودی تعمیراتی نقشہ، جغرافیائی اور ثقافتی شناخت کا عکاس

ولی عہد شہزادہ محمد بن سلمان نے ’سعودی تعمیراتی نقشہ‘ جاری کیا ہے جو مملکت کی متنوع جغرافیائی اور ثقافتی خصوصیات سے متاثر 19 مختلف تعمیراتی طرزپر مشتمل ہے۔

تعمیراتی نقشہ جامع رہنما دستاویز ہے جو مملکت میں تعمیراتی ڈیزائن کے معیارات اور سمتوں کو متعین کرتی ہے۔

 یہ ایک ڈیزائن گائیڈ کے طور پر کام کرتا ہے جو مخصوص طرز تعمیر، ترجیحی تعمیراتی مواد، عمومی ڈیزائن اصول اور جغرافیائی عمومی منصوبے کی وضاحت کرتا ہے۔

اس کا مقصد سعودی عرب کے بھرپور تعمیراتی ورثے کو محفوظ رکھتے ہوئے جدید اور پائیدار تعمیراتی اسلوب اپنانا ہے۔

سعودی تعمیراتی نقشہ ملک کے مختلف شہروں کی شناخت سے ہم آہنگ تعمیراتی طرز شامل کرتا ہے جو مختلف جغرافیائی اور ماحولیاتی حالات کے مطابق ہیں جن میں نجدی طرز تعمیر، حجاز کی طرز تعمیر، ساحلی، پہاڑی اورنخلستانی علاقوں کی طرز تعمیرکی گائیڈ لائن واضح کی گئی ہے۔

سعودی تعمیراتی نقشے میں صرف عمارتوں کی طرز تعمیر ہی واضح نہیں ہے بلکہ تعمیراتی مواد کا بھی خیال رکھا ہے جس میں ایسے تعمیراتی مواد کی استعمال کی حوصلہ افزائی کی گوی ہے جس سےماحولیاتی بد اثرات کم ہوتے ہیں، مقامی معیشت کو فروغ مل سکتا ہے، ڈویلپرز اور مالکان پر اضافی مالی بوجھ نہ پڑتا ہو۔

سعودی تعمیراتی نقشے میں جدید تعمیراتی رہنما اصول شامل ہیں جن میں توانائی کی موثر کھپت، ماحولیاتی اور موسمی حالات کے مطابق تعمیراتی ڈیزائن اورپائیداری اور ماحول دوست تعمیرات کا خیال رکھا گیا ہے۔

سعودی تعمیراتی نقشے میں یہ طے کیا گیا ہے کہ ابتدائی طور پر کن شہروں میں ان رہنما اصولوں کو نافذ کیا جائے گا اور مستقبل میں ان کا دائرہ کار کیسے وسیع کیا جائے گا۔
پہلے مرحلے میں الاحساء، طائف، مکہ مکرمہ اور ابہا میں ان اصولوں کو لاگو کیا جائے گا۔

یہ نقشہ سعودی عرب کے تاریخی تعمیراتی ورثے کے تحفظ میں معاون ہوگا اور جدید ڈیزائن میں روایتی عناصر کو شامل کر کے قومی شناخت کو مزید مضبوط کرے گا۔