جدہ حئی جمیل میں رمضان نائٹس کے ثقافتی پروگرام کا انعقاد

جدہ حئی جمیل میں گزشتہ سال کے پروگرام کی مقبولیت کے بعد ایک بار پھر رمضان نائٹس کا اہتمام کیا گیا ہے جس میں ماہ رمضان کے ثقافتی پروگرام منعقد کئے  گئے ہیں۔

عرب نیوز کے مطابق ’حئی روشن ہو رہا ہے‘ کے عنوان سے یہ ثقافتی تقریب 29 مارچ تک روزانہ رات 9:30 بجے سے صبح 2 بجے تک جاری رہے گی۔

تقریب میں عوامی پروگرام ، روایتی بازار، عارضی ریستوران، صحت و تندرستی اور ورثے سے متعلق ورکشاپس  کے ساتھ دستکاری کی نمائش منعقد کی جا رہی ہے۔

تقریب میں آنے والے مہمان روایتی بورڈ گیمز، لائیو میوزک اور رمضان کے خصوصی پکوان سے بھی لطف اندوز ہو سکتے ہیں۔

آرٹ جمیل کی نائب ڈائریکٹر اور سربراہ برائے تعلیم و تحقیق انس قطّان کے مطابق گزشتہ سال کی تقریب میں مختلف عمر اور پس منظر سے تعلق رکھنے والے40000 سے زائد مہمانوں کو خوش آمدید کہا گیا۔ 

رواں سال کے پروگرام میں ہم  نے لوگوں کی دلچسپی کے لیے مزید ایسے مواقع فراہم کیے ہیں جو یکجہتی، تخلیقی سرگرمیوں اور ثقافتی تبادلے کی عکاسی کرتے ہیں۔

مقدس مہینے کے پیش نظر دستکاری، کہانی نویسی اور تخلیقی کاوشوں سے متعلق مختلف پروگراموں کو ایک چھت کے نیچے اکٹھا کیا گیا ہے۔

تقریب میں مہمانوں کا داخلہ مفت ہے جہاں شاپنگ کے لیے ثقافتی انداز کے  بازار سجائے گئے ہیں جہاں مقامی پکوان، دستکاری سے متعلق اشیاء اور عود کی خوشبو نے دلکش ماحول پیدا کیا ہے۔

تقریب میں ’لیونڈر ایونٹس‘  کے نام سے خاص پروگرام شامل ہے جس کی ذمہ دار غادہ خالد  نے بتایا ہے ’ یہاں ہم نے مختلف مصنوعات پیش کی ہیں جن میں ثقافتی فیشن کے لحاظ سے لباس، عبایا اور روایتی ملبوسات شامل ہیں۔

کھانے کے سٹالز میں میکسیکن، اطالوی مٹھائیاں، ازبک کھانے، خصوصی کافی اور میٹھے پکوان بھی دستیاب ہیں۔

فن، ثقافت اور تفریحی مرکز کی ذمہ دار عبیر دہلاوی  نے بتایا ’ہم رمضان نائٹس میں آنے والوں کے لیے سماجی میل جول کے لطف اور تفریح کے ساتھ خوشگوار تجربہ پیش کرتے ہیں، جہاں روایتی گیمز جیسے کیرم بورڈ، شطرنج اور ڈومینوز جیسے کھیل شامل ہیں۔

تقریب میں آنے والے حئی سنیما سے بھی لطف اندوز ہو سکتے ہیں جہاں ’میرا ورثہ‘  کے نام سے مختصر دورانیے کی فلم پیش کی جا رہی ہے جس میں رات 10 بجے سے بار بار عرب خطے میں واقع عالمی ورثے کی  مختلف کہانیاں نشر کی جاتی ہیں۔