مسجد الحرام اور مسجد نبوی میں رمضان کا پہلا جمعہ، لاکھوں افراد نے نماز ادا کی

سعودی عرب میں لاکھوں فرزندان اسلام نے حرمین شریفین میں رمضان کے پہلے جمعہ کی نماز خشوع و خصوع سے ادا کی اور بیشتر وقت دعاوں میں گزارا۔

سعودی خبررساں ایجنسی ’ایس پی اے‘ کے مطابق ادارہ امور حرمین کی جانب سے مسجد الحرام اور مسجد نبوی میں نماز جمعہ کی ادائیگی کے لیے مثالی انتظامات کیے گئے تھے۔

انتظامیہ نے مسجد الحرام کے اندر اور بیرونی صحنوں میں جمعے کو صبح سے ہی انتظامات مکمل کرلیے تھے تاکہ لوگوں کو کسی قسم کی دشواری کا سامنا نہ کرنا پڑے اور وہ آرام وسکون سے نماز ادا کریں۔

حرمین انتظامیہ نے مسجد الحرام اور مسجد نبوی میں آنے والوں کی سہولت کے لیے 11 ہزار سے زائد کارکنوں کو تعینات کیا تھا جو زائرین کی رہنمائی کرتے ہوئے انہیں نماز کے لیے مخصوص مقامات کی نشاندہی کرتے رہے۔

مسجد نبوی میں بھی انتظامیہ نے زائرین کی بڑی تعداد کے پیش نظر خصوصی انتظامات کیے تھے۔

مسجد نبوی کے بیرونی صحنوں، برآمدوں اور چھت پر بھی نماز ادا کرنے کے لیے خصوصی انتظامات کیے گئے تھے۔

راہداریوں کو خالی رکھنے کےلیے اہکاروں کو جگہ جگہ تعینات کیا گیا تھا جن کی ذمہ داری تھی کہ وہ گزرگاہوں پر لوگوں بیٹھنے نہ دیں۔