نشہ آور گولیاں سمگل کرنے پر شہری کو سزائے موت

سعودی وزارت داخلہ نے کہا ہے کہ نشہ آور گولیاں سمگل کرنے پرسعودی شہری پر سزائے موت کا عدالتی فیصلہ نافذ کردیا گیا ہے۔

سعودی پریس ایجنسی کے مطابق وزارت نے کہا ہے کہ ’سعودی شہری محمد بن ہارون العمرانی کو نشہ آور گولیاں سمگل کرتے ہوئے گرفتار کیا گیا تھا‘۔

’ضابطے کی کارروائی مکمل کرنے کے بعد مذکورہ شخص کو تمام شواہد اور ثبوت کے ساتھ عدالت میں پیش کیا گیا جہاں الزام ثابت ہونے پر اور زمین میں فساد پھیلانے پر سر قلم کرنے کی سزاسنائی گئی‘۔

’فیصلے پر اپیل کورٹ نے تصدیق کی اور ایوان شاہی نے سزا نافذ کرنے کی منظوری دی ہے‘۔

وزارت نے کہا ہے کہ ’آج جمعرات کو تبوک میں عدالت کا فیصلہ نافذ کردیا گیا ہے‘۔