سعودی عرب میں بارش کا نیا سلسلہ جمعے سے شروع ہونے کا امکان

سعودی عرب میں قومی مرکز برائے موسمیات کے ترجمان حسین القحطانی کا کہنا ہے’ مملکت کے مختلف علاقوں میں جمعہ سے بارش کا نیا سلسلہ شروع ہونے کا امکان ہے جو اتوار تک جاری رہے گا۔‘

اخبار 24 کے مطابق قومی مرکز کی جانب سے جاری موسمیاتی رپورٹ کے حوالے سے ترجمان نے بتایا’ مکہ مکرمہ ریجن کے مختلف علاقوں میں ہلکی اوردرمیانے درجے کی بارش کا امکان ہے جبکہ کہیں کہیں ژالہ باری کی بھی توقع ہے۔‘

موسمیاتی رپورٹ میں کہا گیا ہے’ مدینہ منورہ ریجن  کے متعدد علاقے بھی بارش اور گرد وغبار کی لپیٹ میں رہیں گے۔

جبکہ ریاض میں بھی ہلکی اور درمیانے درجے کی بارش کے علاوہ تیز گرد آلود ہوا اور کہیں کہیں ژالہ باری کا امکان ہے۔

مشرقی ریجن کے علاوہ عسیر، تبوک، قصیم ، حائل، الباحہ، حدود الشمالیہ، الجوف اور جازان میں بھی کہیں ہلکی جبکہ بعض علاقوں میں موسلا دھار بارش کے ساتھ ژالہ باری بھی ہو سکتی ہے۔