پی ٹی آئی کے رہنما اسد قیصر نے کہا ہے کہ مولانا فضل الرحمان سے ٹیلیفونک رابطہ ہوا، جس میں مولانا صاحب نے شنگھائی کانفرنس کے تناظر میں 15 اکتوبر کے احتجاج کو موخر کرنے کی اپیل کی۔
اسد قیصر کے مطابق انہوں نے عمران خان کو طبی سہولیات فراہم کرنے اور ان کے ذاتی معالج کو رسائی دینے کا مطالبہ کیا۔
’مولانا صاحب سے آئینی مسودے پر بھی تفصیلی گفتگو ہوئی۔ انہوں نے جمیعت علمائے اسلام کا تیار کردہ آئینی مسودہ پیش کیا، جس میں اکثر نکات پر دونوں سیاسی جماعتوں میں ہم آہنگی پائی جاتی ہے۔ مزید غور و فکر کے لیے 17 اکتوبر کو دونوں جماعتوں کا اجلاس منعقد ہوگا اور اپوزیشن جماعتوں کے مشترکہ مسودے کو حتمی شکل دی جائے گی۔‘
اس قیصر نے کہا کہ ’میں نے مولانا فضل الرحمان کو یقین دلایا کہ ان کی تجاویز کو پارٹی کے سامنے پیش کروں گا اور مشاورت کے بعد انہیں پارٹی فیصلے سے آگاہ کیا جائے گا۔‘
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شوق پورا کر کے دیکھ لیں، کسی کو اس ایریا کے نزدیک نہیں آنے دیا جائے گا: عطا تارڑ
وزیر اطلاعات عطا اللہ تارڑ نے پی ٹی آئی کی 15 اکتوبر کا احتجاج کی کال پر ردعمل دیتے ہوئے کہا ہے کہ اگر انہیں شوق ہے تو پورا کر کہ دیکھ لیں، کسی کو اس ایریا کے نزدیک نہیں لگنے دیا جائے گا۔
انہوں نے کہا کہ ’ایس سی او کے متعلق تمام تر انتظامات مکمل ہیں، اسلام آباد کو سجایا گیا ہے، سکیورٹی کے فُول پروف انتظامات مکمل ہیں، ریجنرز، پولیس اور فوج کے جوان یہاں ڈیوٹی سر انجام دیں گے۔ اس سارے ایریا کو محفوظ بنایا گیا ہے تاکہ نہ صرف ہم اپنے مہمانوں کی حفاظت کر سکیں بلکہ انہیں اچھے طریقے سے ویلکم کر سکیں۔‘
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تحریک انصاف کے سیکریٹری اطلاعات شیخ وقاص اکرم نے کہا ہے کہ اسلام آباد میں احتجاج کے دوران اگر کوئی نقصان ہوا تو ذمہ دار حکومت ہو گی۔
اتوار کو تحریک انصاف کے سیکریٹری نے ایکس پر پوسٹ کیا کہ عمران خان سے ملاقات کی صورت میں احتجاج کی کال واپس لیں گے۔
’اسلام آباد احتجاج کے دوران اگر کوئی نقصان ہوا تو ذمہ دار حکومت ہو گی کیونکہ جن کے پاس طاقت ہو ذمے دار بھی وہی ہوتے ہیں، آپ عمران خان سے ہماری ملاقات کروا دیں ہم احتجاج کی کال واپس لے لیں گے۔‘
ذرائع کے مطابق کور کمیٹی نے بانی تحریک انصاف کی صحت کے بارے میں تشویش کا اظہار کیا ہے۔
کور کمیٹی میں فیصلہ کیا گیا ہے کہ ڈاکٹر، وکیل یا کسی بھی پارٹی رہنما کی ملاقات کرا دی گئی تو احتجاج ملتوی کر دیا جائے گا۔
’ملاقات نہ کرائی گئی تو 15 اکتوبر کو بھرپور احتجاج کیا جائے گا۔‘
سنیچر کو پاکستان کے وزیر دفاع خواجہ آصف نے کہا تھا کہ شنگھائی تعاون تنظیم (ایس سی او) کے اجلاس کے موقعے پر پاکستان تحریک انصاف کو قطعی طور پر احتجاج کی اجازت نہیں دی جائے گی۔
سیالکوٹ میں میڈیا سے گفتگو کے دوران وزیر دفاع خواجہ آصف نے کہا تھا کہ 15 اکتوبر کو وفاق پر یلغار کرنے والوں سے پوری طاقت سے نمٹا جائے گا۔
جمعے کی شام پی ٹی آئی کی سیاسی کمیٹی نے پنجاب کے مختلف شہروں کے لیے دی گئی احتجاجی کال واپس لیتے ہوئے تمام ورکرز کو 15 اکتوبر کو ڈی چوک پہنچنے کی ہدایت کی تھی۔
یہ کال ایک ایسے وقت میں دی گئی ہے جب ٹھیک 15 اکتوبر کو اسلام آباد میں شنگھائی تعاون تنظیم کا اجلاس پاکستان میں پہلی مرتبہ منعقد ہو رہا ہے۔ اور اسی دن چینی وزیر اعظم بھی پاکستان میں پہنچ رہے ہوں گے۔
شنگھائی تعاون تنظیم کا اجلاس 15 سے 16 اکتوبر کو اسلام آباد میں منعقد ہو گا جس کے لیے سکیورٹی کے سخت اقدامات کیے گئے ہیں۔
شنگھائی تعاون تنظیم کے اجلاس میں کن ممالک کے سربراہان شرکت کریں گے؟
پاکستان کی دفتر خارجہ کی ترجمان نے کہا ہے کہ شنگھائی تعاون تنظیم کے سربراہی اجلاس میں چین، روس، بیلاروس، قازقستان، کرغزستان، تاجکستان اور ازبکستان کے وزرائے اعظم شریک ہوں گے۔
اتوار کو ایک بیان میں وزارت خارجہ کی ترجمان نے کہا کہ اجلاس میں ایران کے پہلے نائب صدر اور انڈیا کے وزیر خارجہ شریک ہوں گے۔
پاکستان ایس سی او کے رکن ممالک کے سربراہان حکومت کی کونسل کے 23ویں اجلاس کی میزبانی کرے گا۔
ایس سی او کے موجودہ چیئر کی حیثیت سے وزیر اعظم محمد شہباز اجلاس کی صدارت کریں گے۔
آبزرور ریاست منگولیا کے وزیراعظم اور وزراء کی کابینہ کے نائب چیئرمین ایس سی او اجلاس میں شرکت کریں گے۔
ترکمانستان کے وزیر خارجہ مہمان خصوصی کی حیثیت سے اجلاس میں شرکت کریں گے۔
اسلام آباد پولیس کی جانب سے جاری کردہ ٹریفک پلان
