تعلیمی اداروں کے قریب ہارن بجانے پر 500 ریال جرمانہ

محکمہ ٹریفک نے کہا ہے کہ تعلیمی اداروں کے قریب مسلسل ہارن بجانے اور شور شرابا کرنے پر 500 ریال تک جرمانہ ہوسکتا ہے۔

سبق ویب سائٹ کے مطابق محکمے نے کہا ہے کہ ’ہارن بجانے کے علاوہ گاڑی میں اونچی آواز سے گانے سننااور دوسروں کو پریشان کرنا آداب عامہ کے خلاف ہے‘۔

محکمے نے کہا ہے کہ ’آداب عامہ کے منافی کوئی عمل کیا جائے گا تو اس پر کم سے کم 300 ریال اور زیادہ سے زیادہ 500 ریال جرمانہ ہوگا‘۔

واضح رہے کہ سعودی عرب میں تمام سرکاری سکول میں نئے تعلیمی سال کا آغاز گزشتہ اتوار سے ہوگیا ہے جبکہ نجی اور پرائیویٹ سکول آج منگل سے کھل گئے ہیں۔

محکمہ ٹریفک نے سکول کے اوقات میں بڑی گاڑیوں اور ٹرکوں کے شہر میں داخلے پر بھی پابندی عائد کردی ہے۔