نیوجرسی میں خاتون کی کار سے ہرن ٹکرا گیا

 مقامی محکمہ پولیس کے ڈیش کیم میں ریکارڈ ہونے والی فوٹیج سے بپھرے ہوئے ہرن کی جارحیت کا اندازہ ہوتا ہے۔ فوٹیج دیکھنے سے اندازہ ہوتا ہے کہ ہرن نے رات کے اندھیرے میں ایک مصروف سڑک عبور کرنے کی کوشش کی تھی اور نتیجے میں سڑک سے گزرنے والی ایک کار سے وہ ٹکرا گیا۔ خاتون ڈرائیور نے گاڑی روک لی اور اتر کر یہ دیکھنا چاہا کہ اس تصادم سے گاڑی کو کتنا نقصان ہوا ہے یا ٹکرانے والا جانور کس حال میں ہے؟ بس یہی موقع تھا جب خاتون چند لمحے کیلئے ہرن کی طرف سے غافل ہوئی اور ہرن نے اس پر زور دار حملہ کردیا۔ پولیس کا کہناہے کہ ایسا تصادم شاذو نادر ہی اس علاقے میں دیکھنے میں آتا ہے تاہم شکرکی بات ہے کہ اس تصادم کے نتیجے میں خاتون معمولی زخمی ہوئی ہیں لیکن ہرن کیلئے یہ ٹکر ناقابل برداشت ہوئی اور وہ مر گیا۔ہرن نے کار کے اندر گھسنے کی بھی کوشش کی ۔ واقعہ میں ملوث عورت ایلن ساگر کے نام سے جانی جاتی ہے او راس واقعہ کی پوری وڈیو محکمہ پولیس نے جاری کی ہے۔ اسے ایک پولیس افسر نے ہی تیار کیا ہے جو خاتون کے پیچھے آرہا تھا۔