ابوظبی کورٹ کا جعلسازوں کو ایک لاکھ 65 ہزار درھم واپس کرنے کا حکم
35 ہزاردرھم ہرجانہ بھی ادا کرنے کو کہا گیا ہے۔ (فوٹو الامارات الیوم)
متحدہ عرب امارات میں ابوظبی کی عدالت نے دھوکے بازی میں ملوث تین افراد کے خلاف فیصلہ صادر کرتے ہوئے انہیں جعل سازی سے ہتھیائی گئی ایک لاکھ 65 ہزاردرھم واپس کرنے کا حکم دیا ہے۔
الامارات الیوم اخبار کے مطابق عدالتی حکم میں ہرجانے کے طور پر مدعی کو 35 ہزار درھم بھی ادا کرنے کو کہا گیا ہے۔
عدالت میں دائر مقدمے کی تفصیلات کے مطابق ایک جوڑے کی جانب سے چار افراد کے خلاف دھوکے بازی کا کیس دائر کیا گیا جس میں دعوی کیا گیا تھا کہ ملزمان نے ان سے ایک لاکھ 75 ہزار درھم جعل سازی کے ذریعے حاصل کیے ہیں۔
مدعیان میں عدالت سے مطالبہ کیا تھا کہ انہیں ان کی رقم کے علاوہ مالی اور ذہنی اذیت پہنچنے پر ہرجانے کے طور پر 51 ہزار درھم بھی دلوائے جائیں۔
عدالت میں یہ بات ثابت ہوئی کہ فریق مخالف میں سے ایک کے اکاؤنٹ میں ایک لاکھ 65 ہزار درھم کی رقم مدعی کی جانب سے منتقل ہوئی ہے۔
امارات کی خبروں کے لیے ”اردو نیوز یو اے ای“ گروپ جوائن کریں
