لائیو: انتخابات کے حوالے سے میڈیا رپورٹس پر بات نہیں کریں گے، دفتر خارجہ

الیکشن نتائج میں نواز شریف کے طرزِسیاست کے لیے کیا پیغام ہے؟

پی پی نے حکومت سازی کے لیے پی ٹی آئی سے رابطہ کیا تھا؟

’نئی حکومت گذشتہ حکومت کا ہی تسلسل مگر کمزور ہوگی‘

انتخابی نتائج مسترد، جے یو آئی کا اپوزیشن میں بیٹھنے کا اعلان

وہ ’بچے‘ جو اپنے بڑوں کے سیاسی مستقبل کے فیصلے کرتے رہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تمام پارٹیوں پر مشتمل قومی حکومت بنانے پر غور کیا جائے: خواجہ سعد رفیق

مسلم لیگ ن کے رہنما خواجہ سعد رفیق نے تمام جماعتوں پر مشتمل قومی حکومت بنانے پر غور کا مشورہ دیا ہے۔

جمعرات کو ایکس پر اپنے خیالات کا اظہار کرتے ہوئے انہوں نے کہا کہ ’وفاق میں حکومت سازی کے لیے سادہ اکثریت کسی کے پاس نہیں۔‘

ان کے مطابق ’باہمی نفرت عروج پر ہے، میری ذاتی رائے میں شدید معاشی بحران سے نکلنے، تقسیم در تقسیم کا عمل روکنے، سیاسی تناؤ اور باہمی تلخیاں کم کرنے کے لیے انا اور ضد کے بت توڑ دیے جائیں۔‘

ان کا کہنا تھا کہ ’ایک خاص مدت کے لیے قومی اسمبلی میں موجود تمام جماعتوں پر مشتمل قومی حکومت کی تشکیل پر ٹھنڈے دل سے غور کیا جائے۔‘

خیال رہے خواجہ سعد رفیق حالیہ الیکشن میں اپنی نشست پی ٹی آئی کے حمایت یافتہ امیدوار سردار لطیف کھوسہ کے مقابلے میں ہار گئے تھے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

انتخابات کے حوالے سے میڈیا رپورٹس پر بات نہیں کریں گے: ترجمان دفتر خارجہ

دفتر خارجہ کی ترجمان ممتاز زہرہ بلوچ نے کہا ہے کہ انتخابات کے حوالے سے جو مبصرین کی جانب سے بیانات سامنے آئے ہیں، ان میں بہت سے بیانات حقیقت پر مبنی نہیں۔

ڈان نیوز کے مطابق جمعرات کو ترجمان دفتر خارجہ ممتاز زہرہ بلوچ نے صحافیوں کو ہفتہ وار بریفنگ دیتے ہوئے بتایا کہ دفتر خارجہ کی جانب سے پہلے ہی الیکشن کے حوالے سے بیان جاری ہو چکا ہے۔ ’پاکستان ایک جمہوری ملک ہے جہاں عوام کو اظہار رائے کی آزادی ہے، یہ پاکستان کے عوام کا حق ہے کہ وہ اپنی رائے کا آزادنہ استعمال کر سکیں۔‘

ترجمان کا کہنا تھا کہ الیکشن کمیشن کا ادارہ تمام انتخابی عمل کی نگرانی کر رہا تھا، دولت مشترکہ کے وفد کی جانب سے پاکستان میں انتخابی عمل کی شفافیت کی بات کی گئی، انتخابات کے حوالے سے جو میڈیا رپورٹس سامنے آئی ہیں ان پر ہم بات نہیں کریں گے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

الیکشن کمیشن کشمیر کا خیبر پختونخوا کے نامزد وزیراعلٰی کو گرفتار کرنے کا حکم

پاکستان کے زیرانتظام کشمیر کے الیکشن کمیشن نے خیبر پختونخوا کے نامزد وزیراعلٰی علی امین گنڈاپور کو گرفتار کرنے کے وارنٹ جاری کیے ہیں۔

کشمیر کے چیف الیکشنر کمشنر نے ضلع ڈیرہ اسماعیل خان ڈپٹی کمشنر کو علی امین گنڈاپور کی گرفتاری کا حکم دیا ہے۔

الیکشن کمیشن نے 14 فروری کو خیبر پختونخوا کے نامزد وزیراعلٰی کی گرفتاری کے وارنٹ جاری کیے۔

علی امین گنڈاپور کے خلاف کشمیر کے انتخابات میں ضابطہ اخلاق کی خلاف ورزی کا کیس ہے۔ 

پی ٹی آئی کے ترجمان معظم علی بٹ نے اردو نیوز کو بتایا کہ ایف آئی آر کے سامنے آنے کے بعد فوری طور پر ضمانت  قبل از گرفتاری کرنی پڑے گی جو ایک قانونی طریقہ ہے۔ انہوں نے کہا کہ علی امین گنڈاپور اس سے پہلے بھی تمام کیسز میں ضمانت حاصل کر چکے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

پنجاب، سندھ اور خیبر پختونخوا کے کچھ حلقوں میں دوبارہ پولنگ

الیکشن کمیشن آف پاکستان نے کہا ہے کہ آج پنجاب، سندھ اور خیبر پختونخوا کے کچھ حلقوں میں دوبارہ پولنگ ہو رہی ہے۔

پاکستان کے سرکاری ٹی وی کے مطابق قومی اسمبلی کی نشست این اے 88 خوشاب، حلقہ پی ایس گھوٹکی 1 اور پی ایس 18 اور کوہاٹ کے حلقہ پی کے 90 پر پولنگ شام پانچ بجے تک جاری رہے گی۔

خوشاب مشتعل افراد نے آر او آفس میں بیلٹ باکس سمیت تمام ریکارڈ کو نظر آتش کر دیا تھا، گھوٹکی میں بیلٹ باکس چوری کیے گئے تھے جبکہ کوہاٹ کے علاقے درہ آدم خیل میں 25 پولنگ سٹیشنوں کا پولنگ مواد جلایا گیا تھا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اب تک مسلم لیگ ن میں کون سے اراکین شامل ہوئے اور پی ٹی آئی کے کتنے تھے؟

پاکستان میں انتخابات کے بعد آزاد امیدواران ایک بڑی تعداد میں جیت کا عَلم لیے سامنے آئے۔ خیبر پختونخوا میں کلین سویپ اور پنجاب میں بڑی تعداد میں قومی اسمبلی کی نشستوں پر پاکستان تحریک انصاف کے حمایت یافتہ آزاد امیدوار کامیاب ہوئے۔

سات قومی اسمبلی کے منتخب اراکین نے مسلم لیگ ن میں شمولیت اختیار کی ہے جن میں ایک کا تعلق پاکستان تحریک انصاف سے تھا۔

اس کے علاوہ پنجاب اسمبلی کے منتخب 16 اراکین نے مسلم لیگ ن میں شمولیت اختیار کی ہے جن میں سے صرف تین کا تعلق پاکستان تحریک انصاف سے تھا۔

اس لنک پر کلک کریں 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اتحادی حکومت کا قیام پاکستان کا اندرونی معاملہ ہے: امریکہ

امریکہ نے اتحادی حکومت کے قیام کو پاکستان کا اندرونی معاملہ قرار دیتے ہوئے ایک بار پھر آٹھ فروری کے الیکشن کے دوران دھاندلی کے الزامات کی تحقیقات کا مطالبہ کیا ہے۔

امریکی محکمہ خارجہ کے ترجمان میتھیو ملر نے نیوز بریفنگ میں کہا کہ ’یہ واضح ہے کہ پاکستان کے الیکشن میں مقابلہ ہوا اور ہم پاکستانی عوام کے انتخاب کے نتیجے میں بننے والی نئی حکومت کے ساتھ کام کریں گے۔’

ترجمان نے واشنگٹن میں موجود پاکستانی صحافیوں کے پاکستان میں عام انتخابات، ممکنہ اتحادی حکومت اور دھاندلی کے الزامات کے حوالے سے سوالوں کے جواب دیے۔