ایرانی حملے میں ہلاک اور زخمی ہونے والوں کے لیے حکومتی امداد کا اعلان

بلوچستان حکومت نے پنجگور میں ایرانی میزائل حملے میں نشانہ بننے والوں کے لواحقین کے لیے مالی امداد کا اعلان کیا ہے۔
بلوچستان کے ضلع پنجگور میں منگل کو ایران کی جانب سے میزائل حملے میں دو کم عمر بہن بھائی ہلاک جبکہ ان کی والدہ اور دو بہنوں سمیت چار افراد زخمی ہوگئے تھے۔

بدھ کو وزیراعلٰی سیکریٹریٹ کوئٹہ سے جاری ایک بیان کے مطابق نگراں وزیراعلٰی بلوچستان میر علی مردان ڈومکی نے حملے میں ہلاک اور زخمی ہونے والوں کو امداد کی فراہمی کی ہدایت کی ہے۔
’علی مردان ڈومکی نے دونوں بچوں کے لواحقین اور زخمیوں کی مالی مدد کے لیے ڈپٹی کمشنر پنجگور کو ہدایات جاری کی ہیں اور کہا ہے کہ معاوضے کی ادائیگی کی کارروائی فوری مکمل کریں۔‘
وزیراعلٰی سیکریٹریٹ کے ایک افسر کے مطابق ’دہشت گردی کے متاثرین کی حکومتی پالیسی کے تحت سویلین متاثرین کے برابر معاوضہ ملے گا جو موت کی صورت میں 15 لاکھ روپے فی کس ہے اور زخمی فی کس پانچ لاکھ روپے تک ہے۔‘