واجبات کی عدم ادائیگی پر ملائیشیا میں گراؤنڈ طیارہ پی آئی اے کے حوالے
پی آئی اے نے واجبات ادا کر کے اے 320 طیارے کو اپنی تحویل میں لیا (فوٹو: اے ایف پی)
ملائیشیا میں واجبات کی عدم ادائیگی پر گراونڈ کیا گیا طیارہ اے 320 پاکستان انٹرنیشنل ایئر لائن کے فضائی بیڑے میں شامل ہو گیا ہے۔
بدھ کو وزارت ایوی ایشن کی جانب سے جاری بیان کے مطابق ’ادائیگی کے تنازع پر دو طیارے ملائیشیا میں پھنس گئے تھے جن میں سے ایک اے 320 طیارے کو اسلام آباد ائیرپورٹ پر پی آئی اے حکام کے حوالے کیا گیا۔ پی آئی اے نے واجبات ادا کر کے طیارے کو اپنی تحویل میں لیا۔‘
ترجمان وزارت ایوی ایشن کے مطابق وزیراعظم کے مشیر برائے ہوابازی ایئر مارشل (ر) فرحت حسین کی موجودگی میں طیارہ ایک تقریب کے دوران پی آئی اے حکام کے حوالے کیا گیا۔
اس موقع پر سیکریٹری کیپٹن (ر) سیف انجم، سی ای او پی آئی اے ایئر وائس مارشل عامر حیات، ڈی جی پی سی اے اے خاقان مرتضیٰ اور دیگر سینیئر افسران بھی موجود تھے۔
اس موقع پر مشیر برائے ہوابازی کا کہنا تھا کہ ’نئے طیارے کو باقاعدہ آپریشنل کر کے پی آئی اے کے لیے فائدہ مند بنایا جائے گا۔‘
وزیراعظم کے مشیر برائے ہوا بازی ایئر مارشل (ر) فرحت حسین خان نے تقریب سے خطاب کرتے ہوئے کہا کہ ’طیارے کی پی آئی اے کے فضائی بیڑے میں شمولیت ٹیم کی انتھک کاوشوں کا ثمر ہے۔‘
اُن کا مزید کہنا تھا کہ ’اس طیارے کی شمولیت سے قومی ایئر لائن کی آمدنی میں اضافہ ہوگا۔ دوسرا طیارہ بھی آئندہ دو ہفتوں میں پی آئی اے کے بیڑے میں شامل ہوجائے گا۔‘
