شاہ سلمان کے سامنے گورنر مدینہ اور پانچ ریجن کے نائب گورنروں نے حلف اٹھا لیا

سعودی عرب کے شاہ سلمان بن عبدالعزیز اور ولی عہد شہزادہ محمد بن سلمان کی موجودگی میں بدھ کو ریاض کے قصر عرقہ میں مدینہ منورہ ریجن کے گورنر اور مختلف ریجنز کے پانچ نائب گورنروں نے حلف اٹھایا ہے۔

سرکاری خبر رساں ایجنسی ایس پی اے کے مطابق نئے عہدوں پر تعیناتی کے شاہی احکامات جاری ہوئے تھے۔ حلف برداری کی تقریب میں ولی عہد شہزادہ محمد بن سلمان بھی موجود تھے۔

گورنر مدینہ منورہ ریجن شہزادہ سلمان بن سلطان بن عبدالعزیز، مکہ مکرمہ ریجن کے نائب گورنر شہزادہ سعود بن مشعل بن عبدالعزیز، الشرقیہ ریجن کے نائب گورنر شہزادہ سعود بن بندر بن عبدالعزیز، تبوک ریجن کے نائب گورنر شہزادہ خالد بن سعود بن عبداللہ بن فیصل بن عبدالعزیز، عسیر ریجن کے نائب گورنر شہزادہ خالد بن سطام بن سعود بن عبدالعزیز، الجوف ریجن کے نائب گورنر شہزادہ متعب بن مشعل بن بدر بن سعود بن عبدالعزیز نے اپنے عہدوں کا حلف اٹھایا۔

تقریب حلف برداری میں وزیر داخلہ شہزادہ عبدالعزیز بن سعود بن نایف بن عبدالعزیز نے بھی شرکت کی۔

یاد رہے کہ رواں برس 12 دسمبر کو جاری ہونے والے شاہی فرامین میں مدینہ منورہ میں نئے گورنر جبکہ پانچ ریجنوں میں نائب گورنروں کا تقرر کیا گیا تھا۔

شاہ سلمان نے شہزادہ فیصل بن سلمان کو شاہی مشیر اور کنگ عبدالعزیز فاونڈیشن فار ریسرچ اینڈ آرکائیوز کے بورڈ  آف ڈائریکٹرز کا چیئر مین تعینات کیا تھا۔