مکہ میں گرج چمک کے ساتھ بارش، عمرہ زائرین خانہ کعبہ کا طواف کرتے رہے
کئی علاقوں میں منگل تک بارش کا سلسلہ جاری رہنے کا امکان ہے (فائل فوٹو: سبق)
سعودی عرب مکہ مکرمہ میں پیرکو گرج چمک کے ساتھ بارش کی اطلاعات ہیں۔ سڑکیں زیر آب آگئیں۔
الاخباریہ چینل کے مطابق مسجد الحرام میں عمرہ زائرین بارش کے دوران طواف اور عبادت میں مصروف رہے۔ انہوں نے دعائیں بھی کیں۔
یاد رہے کہ مکہ میں کرائسز اینڈ ڈیزاسٹر منیجمنٹ سینٹر نے ریجن میں خراب موسمی صورتحال کے باعث احتیاطی تدابیر اختیار کرنے کی اپیل کی تھی۔
موسمیات کے قومی مرکز کا کہنا ہے’ مکہ ریجن سمیت مملکت کے کئی علاقوں میں منگل تک بارش کا سلسلہ جاری رہنے کا امکان ہے‘۔
واضح رہے حرمین شریفین انتظامیہ نے مسجد الحرام کی خدمت پر مامور متعدد سرکاری اداروں کے تعاون سے مسجد الحرام میں بارش کے مسائل سے نمٹنے کے لیے ہنگامی سکیموں پر عمل درآمد شروع کررکھا ہے۔
حرمین شریفین انتظامیہ کی کوشش ہے کہ عبادت کے دوران زائرین کی سلامتی کو یقینی بنایا جائے۔
بارش کے دوران مطاف، نماز کے مقامات، داخلی راستوں پر فوری طور پر پانی کی نکاسی اور فرش خشک کیے جانے کو یقینی بنایا جارہا ہے۔
