صحرا میں راستہ بھول جانے والے شہری کو بچالیا گیا 

سعودی صحرا میں راستہ بھول جانے والے معمر شہری کو جو موت کے قریب جا پہنچا تھا سعودی رضاکاروں نے بچالیا۔ 

العربیہ نیٹ کے مطابق صحرا میں راستہ بھول جانے والے معمر شہری نے مدد کی اپیل کی تھی جو وائرل ہوگئی۔ 

 سعودی فلاحی انجمن ’سواعد الوطن‘  (وطن عزیز کے بازو)  نے سوشل میڈیا پر بتایا تھا کہ ایک شخص کی جانب سے مدد کی اپیل ملی ہے۔ اس کی گاڑی جبل شوک کے قریب پھنس گئی اور شہری کی حالت نازک ہے۔ 

فوری طور پر فلاحی انجمن نے پوری ٹیم اس کام کے لیے مختص کردی۔ جبل شوک کے قریب انہیں گاڑی مل گئی تاہم وہاں شہری موجود نہیں تھا۔

پیروں کے نشانات کی مدد سے معمر شہری تک رسائی حاصل کی گئی۔ اس وقت تک وہ مشکل سے سانس لے رہا تھا۔ 

سوشل میڈیا صارفین نے معمر شہری کی جان بچانے پر ’سواعد الوطن‘ انجمن کی تعریف کی ہے۔