سعودی دوست کی شادی پر پاکستانی کے تحفے کی ویڈیو وائرل

سعودی عرب میں سوشل میڈیا پر ایک پاکستانی شہری کے تحفے کی ویڈیو وائرل ہے جس کو بڑے پیمانے پر پسند کیا جا رہا ہے۔

المرصد ویب سائٹ کے مطابق ویڈیو میں دیکھا جاسکتا ہے کہ مملکت میں مقیم ایک  پاکستانی شہری اپنے سعودی دوست کی شادی میں شریک ہے۔

پاکستانی اپنے سعودی دوست کو شادی کی مبارکباد دیتے اور تحفہ دکھاتے ہوئے کہہ رہا ہے کہ ’بخدا یہ میری طرف سے تحفہ ہے، خدارا اسے واپس نہ کیجئے گا‘۔

ویڈیو میں اگلا منظر یہ ہے کہ پاکستانی شہری اپنے سعودی دوست کو شادی کا تحفہ حوالے کر رہا ہے۔

دولہا کے ایک رشتے دار نے تحفہ پیش کرنے اور شادی میں شرکت کرنے پر پاکستانی نوجوان کا شکریہ پرجوش انداز میں ادا کیا۔

سعودی دولہا نے کہا کہ ’اللہ تعالی آپ کو صحت و عافیت سے نوازے، اللہ تعالی آپ کو نعمتوں سے نہال کرے اور آپ ہمیشہ سرخرو رہیں۔‘

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں