سعودی سیکیورٹی اہلکاروں نے خدمت کی بہترین مثالیں قائم کیں

میدان عرفات، مزدلفہ اور منیٰ میں تعینات سکیورٹی اہلکار ڈیوٹی کے دوران عازمین حج کی خدمت میں پیش پیش رہے اور بہترین مثالیں قائم کیں۔

میدان عرفات میں جہاں درجہ حرارت 48 سینٹی گریڈ تک پہنچ گیا تھا۔ شدید دھوپ اور گرمی کے باجود سیکیورٹی اہلکار چہرے پر مسکراہٹ سجائے حجاج کی خدمت کرتے رہے۔

العربیہ نیٹ کے مطابق مناسک حج کی ادائیگی میں آسانی کےلیے سکیورٹی اہلکار گزرنے والے حجاج کے سروں پر پانی کا سپرے کرتے رہے تاکہ گرمی کا اثر کچھ کم کیا جا سکے۔

دوسری طرف سیکیورٹی اہلکار گم ہوجانے اور راستہ بھول جانے والے حجاج کی رہنمائی بھی کرتے رہے۔

ہمدردی اور بھائی چارے کے ان مناظر کی تصاویر سوشل میڈیا پر وائرل ہیں۔ ایک تصویر میں دیکھا جا سکتا ہے کہ سیکیورٹی اہلکار میدان عرفات میں ایک عازم حج کو گلے لگا کر اس کی پیشانی چوم رہا ہے۔