لیبیا کشتی حادثہ کیس کا اہم ملزم پشاور سے گرفتار

ایف آئی اے خیبر پختونخوا زون نے انسانی سمگلنگ کی کارروائیوں میں ملوث ایک ملزم کو پشاور کے علاقے حیات آباد سے گرفتار کیا ہے۔

جمعے کو ایف آئی اے کے ترجمان نے کہا کہ ’دران خان ان لوگوں کو غیرقانونی طور پر بھجوانے میں ملوث ہیں جن کی کشتی لیبیا میں ڈوب گئی تھی۔ ملزم کا تعلق جمرود سے ہے لیکن وہ حیات آباد میں رہائش پذیر ہے۔‘

ترجمان کے مطابق ملزم کے خلاف بھاری رقوم کے عوض لوگوں کو غیرقانونی طور پر ملک سے باہر بھجوانے کے قانونی مائیگرینٹ ایکٹ کے تحت مقدمہ درج تھا۔

ایف آئی اے خیبر پختونخوا زون نے ملزم کو اینٹی ہیومن ٹریفکنگ سرکل راولپنڈی کے حوالے کر دیا ہے۔ 

یاد رہے کہ رواں برس 25 فروری کو پیش آنے والے لیبیا کشتی حادثے میں چھ پاکستانی جان سے گئے تھے۔