شہزادہ خالد بن سلمان سے برطانوی وزیر دفاع کی ملاقات، دفاعی شعبے میں تعاون کا جائزہ

سعودی وزیر دفاع شہزادہ خالد بن سلمان سے بدھ کو ریاض میں برطانوی وزیر دفاع بین والیس نے ملاقات کی ہے۔

سرکاری خبر رساں ایجنسی ایس پی اے کے مطابق ملاقات میں دونوں دوست ملکوں کے درمیان سٹرٹیجک تعلقات کا جائزہ،عسکری اور دفاعی شعبے میں دوطرفہ تعاون اور اسے جدید خطوط پر استوار کرنے پر تبادلہ خیال کیا گیا۔

علاوہ ازیں باہمی دلچسپی کے باہمی امور، علاقائی اور بین الاقوامی حالات اور مسائل کے حل کے لیے کی جانے والی کوششوں پر بھی بات چیت کی گئی۔

دونوں وزرائے دفاع نے فضائی استعداد سے متعلق مستقبل کے پروگرام ’ایف سی اے ایس‘ میں سعودی عرب کی شرکت سے متعلق عزائم کے اعلان پر دستخط کیے جس کے تحت فضائی جنگی آپریشن کے حوالے سے شراکت کا مشترکہ جامع تصور متعین کیا جائے گا۔

علاوہ ازیں ریسرچ منصوبوں، مشترکہ ڈیولپمنٹ، مشترکہ صنعتی منصوبوں کی نشاندہی اور مطلوبہ استعداد کی ضروریات مہیا کرنے والی شراکت پر کام کیا جائے گا۔

اس موقع پر سعودی معاون وزیر دفاع انجینیئر طلال العتیبی، معاون وزیر دفاع برائے ایگزیکٹیو امور خالد حسین البیاری، وزیر دفاع کے دفتر کے ڈائریکٹر جنرل ہشام سیف، سعودی برطانوی دفاعی پروگرام کے ایگزیکٹیو چیئرمین میجر جنرل عبداللہ الربیعہ اور برطانیہ میں سعودی سفارتخانے کے ملٹری اتاشی میجر جنرل ریاض بن محمد ابو عباۃ موجود تھے۔