ڈاکٹرعبداللہ الربیعہ سے ریڈ کراس  اور اقوام متحدہ کے ڈائریکٹرزکی ملاقاتیں  

شاہ سلمان مرکز برائے امداد و انسانی خدمات کے سربراہ ڈاکٹر عبداللہ الربیعہ سے اقوام  متحدہ کے پروگرام برائےانسانی آبادکاری کی ایگزیکٹیو ڈائریکٹر میمونہ محمد شریف نے ملاقات کی۔ 

سعودی خبررساں ادارے ایس پی اے کے مطابق انہوں نے انسانی آباد کاری سے متعلق اقوام متحدہ کے پروگرام اور شاہ سلمان مرکز کے درمیان مشترکہ تعاون کے موضوعات پر تبادلہ خیال کیا۔

اس حوالے سے مناسب رہائش کی فراہمی اور دنیا بھرمیں قدرتی آفات سے متاثرین اور ترک مکانی کرنے والوں کے لیے بنیادی ڈھانچے کی فراہمی کے سلسلے میں دونوں اداروں کے درمیان تعاون کی راہوں پر گفت و شنید ہوئی۔ 

میمونہ شریف نے ریاض کے انٹرنیشنل انسانیت نواز فورم تھری کی کارکردگی کو سراہتے ہوئے کہا کہ اس کی بدولت انسانیت نوازی شعبے کے اہم مسائل کھل کر سامنے آگئے اور متعلقہ اداروں کے درمیان امدادی عمل میں یکجہتی کا معیار بلند کرنے کی کوششیں ہوئیں۔

دوسری جانب شاہ سلمان مرکز کے ڈاکٹر الربیعہ سے ریڈ کراس کے ڈائریکٹر جنرل نے بھی ملاقات کی۔ وہ ریاض فورم میں شرکت کے لیے سعودی عرب آئے ہوئے ہیں۔ 

ڈاکٹرالربیعہ اور ریڈ کراس کے ڈائریکٹر جنرل نے امدادی اور انسانی معاملات سے تعلق رکھنے والے باہمی دلچسپی کے امور اور ریاض انٹرنیشنل فورم کے ایجنڈے پر گفت وشنید کی۔ 

ریڈ کراس کے ڈائریکٹر جنرل نے کہا کہ سعودی عرب شاہ سلمان مرکز برائے امداد و انسانی خدمات کے پلیٹ فارم سے دنیا کے تمام براعظموں میں قابل قدر انسانیت نواز خدمات انجام دے رہا ہے ۔