Sorry, you need to enable JavaScript to visit this website.
بدھ ، 16 جولائی ، 2025 | Wednesday , July   16, 2025
بدھ ، 16 جولائی ، 2025 | Wednesday , July   16, 2025
تازہ ترین

شاہ سلمان کی زیرصدارت کابینہ کا اجلاس، اہم فیصلوں کی منظوری

کابینہ نے قومی مرکز برائے سلامتی ٹرانسپورٹ کے قیام کی بھی منظوری دی ہے( فوٹو ایس پی اے)
سعودی کابینہ نے ٹرانسپورٹ سلامتی کا قومی مرکز قائم کرنے کی منظوری دی ہے۔
سعودی خبررساں ادارے ایس پی اے کے مطابق کابینہ کا اجلاس منگل کو قصر یمامہ ریاض میں شاہ سلمان بن عبد العزیز کی زیر صدارت ہوا ہے۔ 
 اجلاس کے آغاز میں شاہ سلمان بن عبدالعزیز نے امیر کویت اور آذربائیجان کے خطوط سے کابینہ کو آگاہ کیا۔
کابینہ میں گزشتہ دنوں برادراوردوست ممالک کےعہدیداروں کے ساتھ سعودی حکام کی ملاقاتوں اور مذاکرات کے بارے میں رپورٹ پیش کی گئی۔
سعودی کابینہ نے مراکش میں اقوام متحدہ کے ماتحت تمدنی اتحاد کےعالمی فورم میں شرکت کے حوالے سے کہا کہ سعودی عرب مختلف تہذیبوں کے درمیان رابطوں میں توسیع اور مکالمہ کلچر کو رائج کرنے کی کوششوں کا ساتھ دیتا رہا ہے۔ سعودی عرب، اقوام کے درمیان ہم آہنگی اور پرامن بقائے باہم کے عمل کی حمایت کرتا رہے گا۔
وزیر مملکت و رکن کابینہ وقائم مقام وزیر اطلاعات ڈاکٹر عصام سعید نے اجلاس کے بعد ایس پی اے کو بتایا کہ کابینہ نے سعودی عرب کو اقوام متحدہ کے ماتحت عالمی سیاحتی تنظیم کی مجلس عاملہ کا سربراہ  بنائے جانے پر اطمینان کا اظہار کیا اور کہا کہ یہ اس بات کی علامت ہے کہ کثیر فریقی بین الاقوامی کوششوں میں مملکت کا کردار اہم اور موثرہے۔ 
سعودی کابینہ نے کنگ سلمان انٹرنیشنل ایئرپورٹ کےماسٹر پلان کے اجرا پر پسندیدگی کا اظہار کرتے ہوئے کہا کہ اس سے ریاض شہر ٹرانسپورٹ، تجارت اور سیاحت کے حوالے سے انٹرنیشنل فرنٹ بن جائے گا۔ انٹرنیشنل لاجسٹک سینٹر کے  طور پر سعودی عرب کی حیثیت مستحکم ہوگی۔ دنیا  کے دس بڑے طاقتور اقتصادی  شہروں میں ریاض کا نام شامل ہوگا۔ 
قائم مقام وزیر اطلاعات نے بتایا کہ کابینہ نے سال رواں کی تیسری سہ ماہی کے دوران سعودی عرب کی اقتصادی کارکردگی کے انڈیکس کا جائزہ لیا۔ تیل کے ماسوا اشیا کی برآمدات میں 13.1 فیصد شرح نمو پراطمینان کا اظہار کیا گیا۔
سعودی کابینہ  نے گیارہ فیصلوں کی منظوری دی۔ کابینہ نے نیوکلیئر اینڈ ریڈیولاجیکل کنٹرول اتھارٹی کے چیئرمین کو جمہوریہ چیک کے ساتھ ایٹمی نگرانی کے شعبے میں تکنیکی تعاون اور معلومات کے تبادلے کے حوالے سے مفاہمتی یادداشت کا اختیار تفویض کیا۔ 
 متحدہ عرب امارات کی وزارت داخلہ کے ساتھ مشترکہ سیکیورٹی منصوبوں میں معلومات اور ڈیٹا کے تحفظ کے لیے مفاہمتی یادداشت کی منظوری دی گئی۔
کابینہ نے قومی مرکز برائے  سلامتی ٹرانسپورٹ کے قیام کی منظوری دی۔
 سعودی پبلک ٹرانسپورٹ کمپنی (ساپٹکو) کے معاہدے میں 3 فروری 2022 سے 31 دسمبر 2023 تک توسیع کردی۔ توسیع نئے معاہدوں کے بموجب تمام علاقوں میں آپریشنل پروگرام مکمل ہونے تک کی گئی ہے۔

شیئر: