عمران خان کی سعودی ولی عہد محمد بن سلمان کو وزیراعظم مقرر ہونے پر مبارکباد

پاکستان کے سابق وزیر اعظم اور تحریک انصاف کے چیئرمین عمران خان نے سعودی ولی عہد محمد بن سلمان کو وزیراعظم مقرر ہونے پر مبارک باد دی ہے۔

ٹوئٹر پر عمران خان نے لکھا کہ  ’مملکتِ سعودی عرب کا وزیراعظم مقرر کیے جانے پر ولی عہد محمد بن سلمان کو بہت مبارک! آپ کی دوستی اور معاونت پاکستان کے لیے انمول ہے اور آپ اپنے ویژن کی بنا پر مملکت کو ایک نئے دور سے روشناس کرائیں گے۔‘

بدھ کو وزیراعظم شہباز شریف اور آرمی چیف جنرل قمر جاوید باجوہ نے بھی محمد بن سلمان کو وزیراعظم تقرری پر مبارک باد دی تھی۔

عربی میں کی گئی ایک ٹویٹ میں شہباز شریف کا کہنا تھا کہ ’میں ولی عہد شہزادہ محمد بن سلمان بن عبدالعزیز آل سعود کو سعودی عرب کے وزیراعظم کے طور پر تقرری کے موقع پر مبارک باد پیش کرتا ہوں۔‘

ان کا مزید کہنا تھا کہ ’میں ولی عہد شہزادہ محمد بن سلمان بن عبدالعزیز کی کامیابی اور برادر ملک سعودی عرب کے لیے خادمِ حرمین شریفین شاہ سلمان بن عبدالعزیز آل سعود کی قیادت میں مزید ترقی اور خوش حالی کے لیے دعا گو ہوں۔‘