اسلام آباد سے لاپتہ شہری حسیب حمزہ اپنے گھر پہنچ گئے

اسلام آباد پولیس کے مطابق لاپتہ شہری حسیب حمزہ اپنے گھر پہنچ گئے ہیں۔ بدھ کو اسلام آباد پولیس نے اپنے آفیشل ٹوئٹر اکاؤنٹ پر بتایا کہ ’تھانہ شہزاد ٹاون کے علاقے سے اغوا ہونے والے حسیب حمزہ گھر پہنچ گئے۔‘

 ٹویٹ میں کہا گیا ہے کہ ’حسیب حمزہ کے والد نے اسلام آباد کیپیٹل پولیس کی کوششوں کی تعریف کی۔ حسیب حمزہ کے والد نے اسلام آباد ہائی کورٹ کی بھرپور سپورٹ پر تہہ دل سے شکریہ ادا کیا جبکہ ان کی فیملی نے وزیراعظم ، وزیر داخلہ رانا ثناء اللہ خان کا بھی شکریہ ادا کیا۔‘

یاد رہے کہ چیف جسٹس اسلام آباد ہائیکورٹ نے گذشتہ روز آئی جی اسلام آباد کو لاپتہ شہری حسیب حمزہ کو بدھ کو صبح 10 بجے تک عدالت میں پیش کرنے کا حکم دیا تھا۔

عدالت نے خفیہ ایجنسیوں کے سیکٹر کمانڈرز کو بھی پیش ہونے کا حکم دیا تھا۔