جیونی میں کروکر مچھلی ایک کروڑ 35 لاکھ سے زائد میں نیلام
جمعہ 27 مئی 2022 17:49
زین الدین احمد -اردو نیوز، کوئٹہ
بلوچستان کے ساحلی شہر جیونی میں ایک کروکر مچھلی ایک کروڑ 35 لاکھ 80 ہزار روپے میں نیلام ہوئی ہے۔
جمعے کو بلوچستان فشریز ڈیپارٹمنٹ کے انسپکٹر عبدالخالق نے اردو نیوز سے بات کرتے ہوئے بتایا کہ یہ مچھلی 48 اعشاریہ پانچ کلو وزنی ہے۔
انسپکٹر عبدالخالق کے مطابق کروکر مچھلی جیونی میں ایک خوش قسمت ماہی گیر کے جال میں پھنس گئی تھی۔
واضح رہے کہ 15 مئی کو جیونی کے ماہی گیروں کے ہاتھ ایک ساتھ 18 قیمتی مچھلیاں لگی تھیں جن میں سے 22 کلو وزنی سب سے بڑی مچھلی پانچ لاکھ روپے میں فروخت ہوئی تھی۔
شکار کی گئی قیمتی مچھلی کروکر کو مقامی بلوچی زبان میں ’کیر‘ اور اردو میں ’سوا‘ مچھلی کہا جاتا ہے۔
گزشتہ برس مئی میں بھی جیونی میں کروکر مچھلیاں پکڑی گئی تھیں جن سے ایک مچھلی 80 لاکھ روپے میں فروخت ہوئی تھی۔
سمندری حیات کے امور کے ماہر اور ڈبلیو ڈبلیو ایف پاکستان کے ٹیکنیکل ایڈوائزر محمد معظم خان کے مطابق کروکر مچھلی کا گوشت مہنگا نہیں ہوتا لیکن اس کا بلیڈر مہنگا ہوتا ہے جس کی چین، سنگا پور، ہانگ کانگ اور کئی یورپی ممالک میں بڑی مانگ ہے۔
بلیڈر کا استعمال سرجری، ادویات، کاسمیٹکس اور خوراک سمیت ایک خاص قسم کے سوپ میں کیا جاتا ہے۔
گوادر میں ماہی گیر اِن دنوں مالا مال کیوں ہو رہے ہیں؟Node ID: 569966
’کروکر مچھلیوں کی صورت میں گویا ہماری لاٹری لگ گئی‘Node ID: 669336
