سعودی افواج کے سربراہ سے پاکستانی عسکری وفد کی ملاقات

سعودی مسلح افواج کے چیف آف دی جنرل اسٹاف لیفٹیننٹ جنرل فیاض بن حمید الرویلی سے پاکستانی جوائنٹ چیف آف اسٹاف کے چیئرمین لیفٹیننٹ جنرل ندیم رضا نے اپنے وفد کے ہمراہ ملاقات کی ۔

سعودی خبررساں ایجنسی ’ایس پی اے ‘ کے مطابق سعودی مسلح افواج کے سربراہ نے پاکستانی مسلح افواج کے وفد کا استقبال کیا اور انہیں مملکت میں خوش آمدید کہا۔

پاکستانی افواج کے وفد کے سربراہ لیفٹیننٹ جنرل ندیم رضا نے سعودی افواج کے سربراہ کی جانب سے شاندار استقبال کیے جانے پر خصوصی شکریہ ادا کیا۔

 استقبالیہ تقریب کے بعد سعودی ، پاکستان ملٹری کمیٹی کا چھٹا اجلاس ہوا جس میں دونوں برادر ممالک کے درمیان مستحکم تعلقات کے حوالے سے تبادلہ خیال کرتے ہوئے باہمی عسکری تعاون کے امکانات اور ان میں  فروغ کے طریقوں کا بھی جائزہ لیا گیا علاوہ ازیں مختلف باہمی دلچسپی کے امور پرتبادلہ خیال بھی کیا گیا۔